काठमाडौं । राष्ट्रिय जनमोर्चाका महासचिव मनोज भट्टले पाँच दलीय गठबन्धन भत्काउन राष्ट्रिय अन्तर्राष्ट्रिय शक्तिकेन्द्रहरु लागेको बताउनुभएको छ ।
सोमबार नेकपा (एकीकृत समाजवादी) निकट प्रेस युनियनले आयोजना गरेको कार्यक्रममा बोल्दै महासचिव भट्टले पाँच दलीय गठबन्धन तोड्न खोज्नुको उद्देश्य देशमा पुनः प्रतिगमन फर्काउनु रहेको जिकीर पनि गर्नुभयो ।
‘केपी ओलीको प्रतिगामी कदमका विरुद्ध पाँच दलीय गठबन्धन दृढताका साथ उभियो । ओली, राजावादी र भारतको प्रतिगामी उद्देश्यमा अहिले पनि गठबन्धन तगारो बनेको छ’ भट्टले भन्नुभयो, ‘त्यसकारण देश विदेशी शक्तिहरु फेरि पनि गठबन्धन तोडेर प्रतिगमनतर्फ देशलाई धकेल्न चाहन्छन् ।’
महासचिव भट्टले नेकपा (एमाले) ले माधवकुमार नेपाललगायत १४ सांसदलाई कारबाहीको माग गर्दै संसद अवरुद्ध गर्नुको कारण पनि प्रतिगामी उद्देश्यले नै काम गरेको आरोप लगाउनुभयो । उहाँले कानुनअनुसार बनेको एकीकृत समाजवादीका सांसदलाई संसदबाट हटाउन खोज्नु संसद पुनः विघटन गराउने षडयन्त्र भएको पनि बताउनुभयो ।
‘एकीकृत समाजवादी एउटा कानुन अनुसार बनेको छ । त्यो पार्टीको जन्म अध्यादेशबाट भएपनि अब त्यसलाई कानुनले चिनेको छ । यद्यपी अहिले त्यो अध्यादेश खारेज भएको छ’ भट्टले भन्नुभयो, ‘अब कारबाही गरेर हटाउँदा बर्तमान सरकार अलपमतमा पर्नेछ र देश पुनः मध्यावधीमा जानेछ । त्यसरी ओलीलाई आफ्नो प्रतिगामी उद्देश्य पुरा गर्न मद्दत मिल्नेछ । त्यसकारण उनीहरु संसद अवरुद्ध गरिरहेका छन् ।
एमालेबाट गणतन्त्र, सार्वभौमसत्ता र अखण्डतामा खतरा रहेकाले गठबन्धनको आवश्यकता रहेको उहाँको भनाइ छ।
कार्यक्रममा नेकपा (एकीकृत समाजावादी) का अध्यक्ष एवम् पूर्वप्रधानमन्त्री माधवकुमार नेपाल र अर्का पूर्वप्रधानमन्त्री एवम् नेकपा (माओवादी केन्द्रं) का अध्यक्ष पुष्पकमल दाहाल प्रचण्ड प्रमुख अतिथि हुनुहुन्थ्यो ।
