काठमाडौं । नेकपा (मसाल) सहित विभिन्न ८ राजनीतिक दलले यही पुस ६ गते एमसीसीविरुद्ध देशैभर प्रदर्शन गर्ने भएका छन् ।
आइतबार नेत्रविक्रम चन्द ‘विप्लव’ नेतृत्वको नेकपाको कार्यालय बुद्धनगरमा बसेको आठ दलको बैठकले सो निर्णय गरेको हो ।
एमसीसी पेश गर्ने उद्देश्यले संसद बैठक बोलाइएको दिन ६ गते देशैभरी प्रदर्शन गर्ने निर्णय गरिएको नेकपा (मसाल) का प्रवक्ता रामप्रकाश पुरीले जानकारी दिनुभयो ।
नेपाल कम्युनिस्ट पार्टी (मसाल) का महामन्त्री मोहनविक्रम सिंह, नेकपा कम्युनिस्ट पार्टीका महासचिव विप्लव, नेपाल कम्यनिस्ट पार्टी (क्रान्तिकारी माओवादी) का महासचिव मोहनवैद्य किरण, नेपाल कम्युनिस्ट पार्टी (माले) का महासचिव सिपी मैनाली, नेपाल कम्युनिस्ट पार्टीका अध्यक्ष ऋषि कट्टेल, वैज्ञानिक समाजवादी कम्युनिस्ट पार्टी, नेपालका संयोजक आहुती, देशभक्त जनगणतान्त्रिक मोर्चा, नेपालका अध्यक्ष सिपी गजुरेल र राष्ट्रिय जनमोर्चाका अध्यक्ष चित्रबहादुर केसीद्वारा आइतबार जारी संयुक्त विज्ञप्तिमा संघर्षका कार्यक्रम सार्वजनिक गरिएको छ ।
विज्ञप्तिमा भनिएको छ, ‘मंसिर २८ गते नै संसदबाट पारित गराउने देउवा सरकारको योजना जनताको संघर्षको तागतले असफल भएपछि पुस ६ गते बोलाएको संसद बैठकबाट जुनसुकै अवस्थामा पनि पारित गराइ लागू गर्ने दुस्साहसपूर्ण हर्कमा देउवा सरकार रहेकाले त्यसलाई असफल पार्न संघर्षको थप कार्यक्रम घोषणा गरेका छौँ ।’
‘राजावादीलाई सामेल गर्नु कमजोरी’
बैठकमा यसअघि मंसिर २८ गते संसद भवन घेराउ गर्ने कार्यक्रममा पूर्वसहमति विपरितका क्रियाकलापबारे समीक्षा गरिएको मसाल प्रवक्ता पुरीले जानकारी दिनुभयो । सो कार्यक्रममा राजावादीहरुलाई सामेल गरिएपछि नेकपा (मसाल) र राष्ट्रिय जनमोर्चाका नेताहरुले सम्बोधन गरेका थिएनन् ।
आगामी दिनमा त्यसखाले कमजोरी नदोहोर्याउने र पूर्वसहमति अनुसार नै आन्दोलन अगाडि बढाउने प्रतिवद्धता बैठकमा व्यक्त भएको पुरीले बताउनुभयो ।
