अब्दुल्लाह कैफी
अध्यक्ष मण्डल सदस्य, बंगलादेश कम्युनिस्ट पार्टी तथा संयोजक, आइकोर एसिया

० तपाईंं काठमाडौँमा कुन अवसरमा आउनुभएको थियो ?

– सर्वप्रथम त मलाई अन्तर्वार्ता दिने अवसर प्रदान गर्नुभएकोमा धन्यवाद दिन चाहन्छु । म नेकपा (एमाले) को दशौँ महाधिवेशनमा सहभागी हुनका लागि नेपाल आएको थिएँ ।

० तपाईंको पार्टी अर्थात् बङ्गलादेश कम्युनिस्ट पार्टीको महाधिवेशन कहिले हु“दै छ ?

– हाम्रो पार्टीको बाह्रौँ महाधिवेशन आगामी फेबु्रअरी १०–१३, २०२२ मा हुने तय भएको छ । कोरोना महामारीका कारण निर्धारित समयभन्दा एक वर्षपछि यो महाधिवेशन हुन लागेको हो ।

० के तपाईंंले हामीलाई आफ्नो पार्टीको अन्तर्राष्ट्रिय परिस्थितिसम्बन्धी नीतिबारे जानकारी दिन सक्नुहुन्छ ?

– साम्राज्यवादले समाजवाद र माक्र्सवाद–लेनिनवादमाथि वैचारिक रूपमा प्रहारलाई तीव्र पारेको छ । यसले शान्ति, लोकतन्त्र र प्रगतिका सबै शक्तिमाथिको प्रहार पनि तीव्र बनाएको छ । साम्राज्यवाद र विस्तारवाद साम्प्रदायिकताका संरक्षक हुन् । अफगानिस्तानमा अमेरिकी साम्राज्यवादले तालिबानलाई सत्ता हस्तान्तरण गरेपछि यसबाट दक्षिण एसियामा सामाजिक र राजनीतिक अशान्ति सिर्जना गर्छ । हाम्रो दृष्टिकोणमा विश्वका क्रान्तिकारी मजदुर वर्गका दलहरूले आफ्नो सहकार्यलाई अझ बलियो बनाउन र एकताबद्ध रूपमा साम्राज्यवादको विरुद्ध वैचारिक र राजनीतिक लडाइँ अझै अगाडि बढाउनु जरुरी छ । त्यसैले हामी कम्युनिस्ट पार्टीभित्रको एकता, कुनै खास देशमा कम्युनिस्ट पार्टीहरूबिचको एकता र क्षेत्र र सम्पूर्ण विश्वका कम्युनिस्ट पार्टीहरूबिच गठबन्धनको वकालत गरिरहेका छौँ ।

हाम्रा देशविशेषका अलग अलग समस्या भए पनि हामी दक्षिण एसियाका एक अर्ब नौ करोड जनताका साझा समस्या छन् । गरिबी, साम्प्रदायिकता, अशिक्षा, पुँजीवादी शोषण, साम्राज्यवादी र विस्तारवादी आक्रमण हाम्रा साझा शत्रु हुन् । हामी दक्षिण एसियाका उत्पीडित जनताले गरिबी, भोकमरी, साम्प्रदायिकता, पुँजीवाद, साम्राज्यवाद र विस्तारवाद अर्थात् सबै खाले दादागिरीको विरुद्ध मिलेर लड्नुपर्छ ।

० नेकपा (मसाल) र बङ्गलादेश कम्युनिस्ट पार्टी र हामी दुई पार्टीका भ्रातृ सङ्गठनमाझको सम्बन्ध अभिवृद्धिका लागि थप नीति के निश्चित गर्नुभएको छ ?

– नेपाल कम्युनिस्ट पार्टी (मसाल) नेपालमा हाम्रो प्राकृतिक सहयात्री हो । आई.सी.ओ.आर. (क्रान्तिकारी पार्टी तथा सङ्गठनहरूको अन्तर्राष्ट्रिय समन्वय) को सदस्य पार्टी भएकाले हामी दुवै पार्टीको माझमा निकै न्यानो सम्बन्ध छ । यो सम्बन्ध आगामी दिनमा पनि कायम रहिरहनेछ र अझै प्रगाढ हुने छ । हामीमाझ पार्टी–पार्टीमाझको सम्बन्ध छ र यसका साथसाथै हामी हाम्रा जनसङ्गठन स्तरमाझको सम्बन्धलाई अझ अगाडि बढाउन सक्छौँ ।

० तपाईंको पार्टीले आगामी दिनमा दोस्रो विश्व किसान सम्मेलन गर्न लागेको छ । त्यससम्बन्धी तपाईंहरूको तयारीका बारेमा केही भन्न सक्नुहुन्छ ?

– यो प्रश्न सोध्नुभएकोमा धन्यवाद । यो दोस्रो विश्व किसान सम्मेलन कोभिड–१९ महामारीको कारण लामो समयदेखि रोकिएको छ । अर्को वर्ष हाम्रो पार्टी काङ्ग्रेस (महाधिवेशन) र हाम्रो कृषक समितिको सम्मेलन पनि छ । सन् २०२२ को अन्त्यमा वा २०२३ को सुरुवातमा हामीले दोस्रो विश्व किसान सम्मेलन आयोजना गरिने छ भन्ने आशा राख्दछौँ । सम्मेलनलाई भव्य रूपमा सफल बनाउन हामी सबैले सक्दो प्रयास गर्ने छौँ । अग्रिम रूपमा हामी तपाईंंहरूको किसान सङ्गठन (अखिल नेपाल किसान महासङ्घ–अप्फा)र अन्य किसान सङ्गठनलाई आमन्त्रित गर्दछौँ ।

अन्तमा म नेकपा (मसाल) का सम्पूर्ण कमरेड तथा यस मिडियाका सम्पूर्ण पाठकहरूप्रति शुभकामना व्यक्त गर्दछु ।

(अङ्ग्रेजीबाट नेपालीमा अनुवाद : मधु क्षेत्री)