फाइल फोटो
काठमाडौं । नेकपा (मसाल) सहित विभिन्न ८ राजनीतिक दलले अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) खारेज गर्न माग गर्दै संयुक्त आन्दोलनको घोषणा गरेका छन् ।
दलहरुले एमसीसी संसदमा पेश नगर्न दबाब दिने उद्देश्यले संघीय संसद र एमसीएको नेपालस्थित कार्यालय घेराउ गर्ने भएका छन् ।
नेकपा (मसाल), नेत्रविक्रम चन्द विप्लव नेतृत्वको नेपाल कम्युनिष्ट पार्टी, नेकपा (क्रान्तिकारी माओवादी), नेकपा (माले), ऋषि कट्टेल नेतृत्वको नेकपा, आहुती नेतृत्वको वैज्ञानिक समाजवादी कम्युनिष्ट पार्टी, देशभक्त जनगणतान्त्रिक मोर्चा र राष्ट्रिय जनमोर्चाले आन्दोलनको घोषणा गरेका हुन् ।
घोषित कार्यक्रम अनुसार मंसिर २७ गते काठमाडौंस्थित एमसीसीको कार्यालय घेराउ गर्ने र २८ गते संसद भवन घेराउ गर्ने कार्यक्रम छ ।
यस्तै, मंसिर २४ देखि २६ गतेसम्म विभिन्न दल तथा संगठनले आयोजना गरेका विरोध कार्यक्रमलाई समर्थन गर्दै सफल पार्ने आठ दलद्वारा जारी विज्ञप्तिमा उल्लेख छ । सो समयमा राष्ट्रिय जनमोर्चाले देशैभर विरोध प्रदर्शनको घोषणा गरेको छ ।
आठ दलले परिस्थिती हेरेर थप कार्यक्रम घोषणा गर्ने जनाएका छन् । स्मरणीय छ, अमेरिकाले यही मंसिर २८ गतेभित्र एमसीसीबारे निर्णय गर्न नेपाल सरकार र राजनीतिक दलहरुलाई ‘अल्टिमेटम’ दिएको थियो । सरकारले सोही मितिमा संसद बैठक बोलाएको छ ।
