जनकपुरधाम । प्रदेश २ का मुख्यमन्त्री लालबाबु राउतले विश्वासको मत पाउनु भएको छ । उहाँले प्रदेशसभामा कायम १०४ प्रदेश सभा सदस्य संख्या मध्ये ७७ मत पाउनुभएको हो । विपक्षमा २३ मत परेको छ ।
बुधबार बसेको प्रदेशसभाको सातौं अधिवेशनको पहिलो बैठकमा उहाँले विश्वासका मत माग्नुभएको थियो । उहाँले आफ्नै पार्टी सत्तारूढ दल जनता समाजवादी (जसपा)को ३०, सत्ताघटक नेपाली कांग्रेसको १९, नेकपा माआवादी केन्द्रको ८ र सत्ता बाहिर रहका नेकपा एकीकृत समाजवादी पार्टीको ११ मत पाउनुभएको थियो । जसमा एकीकृत समाजवादीका दुइजना सांसद डिल्ली उप्रेती र मन्जु यादव अनुपस्थित रहे ।
प्रमुख प्रतिपक्षी दल लोकतान्त्रिक समाजवादी पार्टीका १५ सांसद र प्रतिपक्षी नेकपा एमालेका ८ सांसदले विपक्षमा मतदान गरेका थिए । जसमा लोसपाकी प्रदेश सांसद डिम्पल झा अनुपस्थित थिइन् । विश्वासको दुई तिहाइ मत पाएसँगै लालबाबु राउत सरकार शक्तिशाली बनेको छ ।
फोरम र राजपा २०७७ वैशाख १० मा जसपा बनेको थियो । त्यसपछि उसको एकल बहुमतको सरकार भएको थियो । गत भदौ ९ गते जसपा औपचारिक रूपमा विभाजन भएको थियो ।
तर निर्वाचन आयोगले सनाखतको समय भदौ २२ गतेसम्म तोकेकाले त्यसको एक महिनाभित्र मुख्यमन्त्री राउतले विश्वासको मत लिनु थियो ।
