काठमाडौं । पूर्वी नवलपरासीको गैंडाकोटमा बस र ट्रक आपसमा ठोक्किँदा तीन जनाको मृत्यु भएको छ। पूर्वपश्चिम राजमार्गमा पर्ने गैँडाकोट–१० स्थित २३ स्मृति पुल नजिक काँकडभिट्टाबाट महेन्द्रनगरका लागि छुटेको सुप्र–२–००१ नम्बरको बस र ना६ख ७१२६ नम्बरको ट्रक बिहान करिब चार बजे एक आपसमा ठोक्किएर दुर्घटना भएको जिल्ला प्रहरी कार्यालय नवलपरासीले जनाएको छ।

दुर्घटनामा परी २४ जना घाइते भएका छन् । घाइतेमध्ये तीन जनाको अवस्था गम्भीर छ । घाइते २४ जनाको नयाँ मेडिकल कलेज भरतपुरमा उपचार भैरहेको छ।

दुर्घटनामा दुईजना महिला र एक पुरुषको मृत्यु भएको हो । मृतकको पहिचान खुल्न बाँकी छ। गम्भीर घाइते भएका उनीहरुलाई उपचारको लागि चितवनको भरतपुरस्थित नयाँ मेडिकल कलेज लगिएको थियो । उपचारकै क्रममा उनीहरुको मृत्यु भएको प्रहरीले जनाएको छ।

बसमा चालकसहित २७ जना सवार थिए । दुर्घटनापछि बस सडकबाट तल खसेको छ। दुर्घटनामा ट्रक चालकसमेत घाइते भएका छन् ।
दुर्घटनाको सम्बन्धमा थप अनुसन्धान भइरहेको प्रहरीले जनाएको छ।