काठमाडौं । नेपाल कम्युनिस्ट पार्टी(मसाल) ले पूर्व प्रधानमन्त्री झलनाथ खनाललाई सरकारले दिएको उपचार खर्चविरुद्ध सर्वोच्चमा रिट हाल्ने विषयलाई गलत भएको बताएको छ ।

अखिल (छैठौं) का अध्यक्ष विमल पोखरेलले सो रिट दायर गर्नुभएको थियो । (मसाल) ले ‘मानवीय र व्यक्तिगत प्रश्नलाई त्यसरी उठाउनु हाम्रो पाटीको पहिलेदेखिको अभ्यासका विरुद्ध रहेको’ भन्दै रिट निवेदक पोखरेलको उक्त कार्यप्रति पार्टीको सहमति नरहेको स्पष्ट पारेको छ ।

यस्तै, पोखरेलले पार्टी र विद्यार्थी संगठनसँग समेत सल्लाह नगरी केपी ओलीका प्रतिगामी कदमलाई सहयोग पुग्नेगरी विभिन्न अनलाइन तथा फेसबुकमा स्ट्याटस लेख्ने गरेको भन्दै सचेत गराएको छ ।

प्रवक्ता रामप्रकाश पुरीद्वारा जारी विज्ञप्तिमा भनिएको छ,
१. ‘ओली सरकारद्वारा दुबैपल्ट संसदको विघटनलाई हाम्रो पार्टीले असंवैधानिक, अप्रजातान्त्रिक, अधिनायकवादी र प्रतिगामी समेत भएको भनेर ठहर गरेको थियो । दुबैपल्ट संसदको पुनस्र्थापना भयो र ओली सरकार अपदस्त पनि भयो । तर त्यसपछि पनि ओलीबाट प्रतिगमनको खतरा अझै टरेको छैन । त्यसकारण अहिले पनि उनका विरुद्धको संघर्षमा लगातार जोड दिनुपर्छ भन्ने हाम्रो दृढ मत रहेको छ ।

२. इतिहासका बेग्लाबेग्लै कालखण्डमा प्रतिगमनका विरुद्ध संघर्ष गर्नका लागि सहमत हुने विभिन्न राजनीतिक शक्तिहरु, माओवादी, एमाले, नेपाली काँग्रेस, मधेशवादीहरुसित पनि हामीले कार्यगत एकता वा सहकार्य गर्दै आएको हाम्रो पार्टीको इतिहास छ । महाकाली सन्धिका विरुद्धको संघर्षमा हामीले राप्रपासित समेत तालमेल गरेका थियौँ । त्यस प्रकारको संयुक्त आन्दोलनद्वारा नै हामीले २०४६ साल र ६२/६३ सालमा पनि प्रतिगमनलाई पराजित गर्न सफल भएका थियौँ ।

३. त्यही प्रकारको नीतिद्वारा अहिले हाम्रो पार्टीले माओवादी, एमाले (माधव–खनाल पक्ष), नेका र जसपा समेतसित गठबन्धन गरेर ओलीको प्रतिगमनका विरुद्ध संघर्ष गरेको थियो । त्यस प्रकारको संघर्षको परिणामस्वरुप नै संसदको पुनस्र्थापना भएको थियो र ओली सरकार अपदस्त भएको थियो ।

४. ओलीको प्रतिगमनको खतरा अहिले पनि भएको हुनाले हामीले अहिले पनि गठबन्धनलाई कायम राख्ने तथा गठबन्धनद्वारा बनेको सरकारलाई समर्थन गर्ने नीति अपनाएका छौँ ।

५. हामीले २०४६, ०६२/०६३ वा अहिले पनि प्रतिगमनका विरुद्धको संघर्षमा अपनाएको नीति संयुक्त मोर्चाको माक्र्सवादी–लेनिनवादी सिद्धान्त अनुरुप नै छ, जसले आवश्यकताअनुसार विभिन्न राजनीतिक मतभेद भएका शक्तिहरुसित पनि कार्यगत एकता वा सहकार्यमा जोड दिन्छ र त्यसो गर्दा एकताका साथै मतभेद कायम राख्न आफ्नो नीतिलाई पनि सुरक्षित राख्ने गर्दछ ।

६. तर का. विमल पोखरेलले हाम्रो पार्टीको त्यस प्रकारको नीतिसित मेल नखाने कतिपय लेख वा टिप्पणीहरु अनलाइन वा सामाजिक सञ्जालमा लेखेको र कतिपय त्यही प्रकारका लेखहरुलाई सामाजिक सञ्जालमा सेयर गरेको कार्यप्रति हाम्रो पार्टीको गम्भीर ध्यान आकर्षित भयो । पूर्व प्रधानमन्त्री झलनाथ खनालले दिल्लीमा उपचार गराउँदा सरकारले उपचारका लागि दिएको सहयोगका विरुद्ध पनि सर्वाेच्चमा रिट दिनु भएको छ । एउटा मानवीय र व्यक्तिगत प्रश्नलाई त्यसरी उठाउनु हाम्रो पाटीको पहिलेदेखिको अभ्यासका विरुद्ध रहेको छ । त्यसमाथि त्यो रिट दिने बेलामा उहाँले पार्टीसित पनि कुनै सल्लाह गर्नुभएको जानकारी दिनु भएको थिएन ।

७. उहाँ अखिल नेपाल राष्ट्रिय स्वतन्त्र विद्यार्थी युनियन (छैठौँ)का अध्यक्ष हुनुहुन्छ । तर माथि लेखिए अनुसारका पार्टीको नीतिसित मेल नखाने विचारहरु प्रकट गर्दा उहाँले आफ्नो संगठनसित पनि सल्लाह लिएको देखिँदैन ।

८. उहाँ राष्ट्रिय जनमोर्चाकी उपाध्यक्ष तथा प्रवक्ता र प्रतिनिधि सभाकी सदस्य का. दुर्गा पौडेलको सचिव पनि हुनुहुन्छ । तर उहाँले त्यो रिट दिने बेलामा उहाँ (दुर्गा पौडेल)सित पनि सल्लाह गर्नु भएको छैन ।

९. उहाँका उपर्युक्त कार्यहरुबाट, एकातिर, ओलीको प्रतिगमनलाई बल पुग्ने तथा प्रतिगमनको विरुद्धको गठबन्धनलाई आँच पुग्ने कुरा स्पष्ट छ । त्यसैले उहाँका ती सबै विचार र कार्य(सर्वाेच्च अदालतमा प्रस्तुत गरेको रिट) समेत पार्टीको नीति, निर्णयसित मेल नखाने भएको र तिनीहरुसित हाम्रो असहमति भएको कुराको जानकारी गराउन चाहान्छौँ ।’