काठमाडौँ । राष्ट्रिय जनमोर्चाले नेपाल आयल निगमद्वारा हालै गरिएको पेट्रोलियम पदार्थको मूल्यवृद्धि फिर्ता लिन माग गरेको छ ।
अध्यक्ष चित्रबहादुर केसीको हस्ताक्षरमा २०७८ भदौ ८ गते जारी प्रेसवक्तव्य राजमोको यस्तो धारणा सार्वजनिक भएको हो ।
कोरोनाका कारण कष्टपूर्ण जनताको जनजीवनमा चाडवाडको मुखमा पुनः मूल्यवृद्धि गर्दा झनै नकारात्मक प्रभाव पार्ने उल्लेख गरिएको सो वक्तव्यमा सरकारले अन्य खर्च कटौती गरेर, अनियमितता रोकेर वा अनुदान दिएर भए पनि मूल्यवृद्धि रोक्न माग गरिएको छ ।
यस्तो छ, प्रेसवक्तव्यको पूर्ण पाठ
“पेट्रोलियम पदार्थमा गरिएको मूल्यवृद्धिको राष्ट्रिय जनमोर्चाले विरोध गर्दछ । केही समय अघिदेखि लगातार हरेक चिजमा मूल्यवृद्धि हुँदै आएको छ । त्यसमाथि अहिलेको यो मूल्यवृद्धिले पेट्रोलियम पदार्थमा आधारित वस्तु तथा सेवामा मूल्यवृद्धि भएको छ । यसको प्रभाव समग्र आर्थिक क्षेत्रमा पर्ने छ । त्यसबाट दैनिक उपभोग्य वस्तु, सेवा, उद्योग, व्यापार, व्यवसाय आदि सबै क्षेत्रमा मूल्यवृद्धि हुने छ ।
कोरोना भाइरसको प्रकोप र त्यसको रोकथामका लागि भएको लकडाउनका कारणले समग्र आर्थिक क्षेत्र र जनसाधारणको जनजीवन अत्यन्त कष्टपूर्ण बनेको छ । यो स्थितिमा सरकारले कोभिडको नियन्त्रण र जनजीवनलाई प्राथमिकतामा राख्नुपर्दछ । तर यो मूल्यवृद्धिले तिनीहरूमा नै नकारात्मक प्रभाव परेको छ । त्यसको साथै चाडवाडको मुखमा आएर गरेको मूल्यवृद्धिले जनतालाई झन् आहत पार्ने छ । त्यसकारण अन्य क्षेत्रको खर्च कटौती गरेर, अनियमिततालाई रोकेर, आवश्यक परे राज्यले अनुदान थपेर भए पनि यो मूल्यवृद्धिलाई सरकारले फिर्ता लिनुपर्छ ।”
