पोखरा । मनाङका केही विद्यालयमा विद्यार्थी नै नभए पनि करारमा शिक्षक राखिएको घटना सार्वजनिक भएको छ । महालेखा परीक्षकको ५८औँ प्रतिवेदनमा सो तथ्य खुलेको हो ।

मनाङको फू आधारभूत विद्यालयमा बालविकासबाहेक अन्य विद्यार्थी छैनन् तर गाउँपालिकाले विद्यालयका दुई स्थायी र एक करार गरी तीन शिक्षकको तलबभत्तालगायतका सुविधाका लागि वार्षिक रु १२ लाख ६५ हजार निकासा गर्दै आएको प्रतिवेदनमा उल्लेख छ ।

त्यस्तै, ङिस्याङ गाउँपालिकाअन्तर्गतको ङावल आधारभूत विद्यालयमा विद्यार्थी नै नभएको र विद्यालयका आठ स्थायी शिक्षकका लागि तलबभत्तालगायतका सुविधा दिइएको प्रतिवेदनमा पाइएको छ । शिक्षकको तलबभत्तासहितको सुविधाबापत गाउँपालिकाले वार्षिक रु ३५ लाख ८६ हजार निकासा गरेको प्रतिवेदनमा देखिएको छ ।

त्यहाँका चार वटै पालिकामा सबैभन्दा धेरै बेरुजु शिक्षा क्षेत्रमा देखिएको छ । (रासस)