कावासोती । नवलपरासीमा कम्युनिस्ट आन्दोलनको इतिहास “विकल्प” लोकार्पण भएको छ ।
राष्ट्रिय जनमोर्चा नवलपुरको मुखपत्र “विकल्प” लाई नवलपरासीको कम्युनिष्ट आन्दोलनको इतिहास विशेषाङ्कको रूपमा प्रकाशन गरी २०७८ भदौ ३ गते सदरमुकाम कावासोतीमा एक कार्यक्रममाझ लोकार्पण गरिएको हो ।
सहिद परिवार पूर्णबहादुर परियारकी पत्नी लालमाया परियार र यामबहादुर कार्कीकी आमा कुमारी कार्कीले संयुक्त रूपमा सो पुस्तक लोकार्पण गरिएको थियो ।
पुस्तकमाथि टिप्पणी र शुभकामना दिँदै राजमो पूर्वकेन्द्रीय सचिव कृष्ण अधिकारीले इतिहास कहिल्यै पूर्ण नहुने हुँदा कैयौँ कुरा छुटेको भए पनि भावी पुस्ताले जोड्दै जाने बताउनुभयो । आज त्याग र समर्पणले पार्टीमा लाग्ने भन्दा पनि व्यक्तिगत फाइदा हेरेर पार्टीमा लाग्ने प्रवृत्ति रहेको, वर्गीय सद्भाव टुट्दै गएको पनि उहाँले बताउनु भयो ।
नेपाली काङ्ग्रेसका कार्यलय सचिव गोपाल बास्ताकोटीले राजमोले जिल्लाको एउटा आन्दोलनको इतिहास लेखेर राम्रो कार्य गरेको बताउँदै वाम र प्रजातान्त्रिक आन्दोलनको इतिहास नजोडी इतिहास पूर्ण नहुने बताउनुभयो ।
संविधान सभाका सदस्य तथा नेकपा (एमाले) का नेता कृष्ण पौडेलले कम्युनिस्टहरूको फुट–विभाजनको शृङ्खला नरोकिँदासम्म कम्युनिस्ट आन्दोलनले पूर्णता नपाउने बताउनुभयो ।
त्यसैगरी कार्यक्रममा नेकपा (माओवादी) का मित्रशरण शर्मा, नेकपा (क्रान्तिकारी–माओवादी) का पिताम्बर तिवारी, वामपन्थी बुद्धिजीवी युवराज पन्थी, नेकपाका शरद ओली, श्याम भुसाल, कमल ज्ञवाली, अशोक लम्साल, धर्म केसीलगायतले मन्तव्य राख्नुभएको थियो ।
विकाराम चौधरीको स्वागत, देवराज पौडेलको सञ्चालनमा अघि बढेको उक्त कार्यक्रमको सभापतित्व राजमो जिल्ला अध्यक्ष दीपक पाण्डेले गर्नुभएको थियो ।
