काठमाडौं । सरकारले प्रदेश प्रमुख हटाउने तयारी गरेको छ । तत्कालीन केपी शर्मा ओली नेतृत्वको सरकारले नियुक्त गरेका प्रदेश प्रमुखहरुलाई कांग्रेस नेतृत्वको सरकारले बिदा गर्न लागेको हो ।
पहिलो चरणमा लुम्बिनी, गण्डकी र प्रदेश २ का प्रमुखलाई हटाउने तयारी छ । प्रधानमन्त्री शेरबहादुर देउवा नेतृत्वको सरकारले उनीहरुलाई तत्कालै हटाउने स्रोतले जनाएको छ ।
प्रधानमन्त्री देउवाले ओलीले नियुक्त गरेका प्रदेश प्रमुख हटाएर कांग्रेस, माओवादी, जसपा उपेन्द्र यादव समूह र एमालेको माधव नेपाल समूहकालाई भागवण्डासहित नियुक्ति गर्ने तयारी गर्नुभएको हो । यसअघि ओली नेतृत्वको सरकारले पनि तत्कालिन प्रदेश प्रमुखलाई हटाएर आफू पक्षीयलाई नियुक्त गरेको थियो ।
ओली सरकारले प्रदेश २ मा तत्कालीन प्रमुख तिलक परियारलाई हटाएर डा. राजेश अहिराजलाई नियुक्त गरेको थियो । उता गण्डकीमा अमिक शेरचनलाई हटाएर सीता पौडेललाई नियुक्त गरिएको थियो । नेकपा विभाजित भएपछि माओवादी कोटाबाट बनेका शेरचन र परियारलाई एमालेको एकल सरकार हुँदा हटाइएको थियो । लुम्बिनीमा कांग्रेसबाट नियुक्त उमाकान्त झालाई हटाएर धर्मनाथ यादवलाई प्रदेश प्रमुख बनाइएको थियो ।
हाल प्रदेश १ प्रमुखमा सोमनाथ अधिकारी, प्रदेश २ प्रमुखमा डा. राजेश झा वागमती प्रदेश प्रमुखमा विष्णु प्रसाद प्रसाई, गण्डकी प्रदेश प्रमुखमा सीताकुमारी पौडेल, लुम्बिनी प्रदेश प्रमुखमा धर्मनाथ यादव, कर्णाली प्रदेश प्रमुखमा गोविन्द प्रसाद कलौनी र सुदुरपश्चिम प्रदेश प्रमुखमा गंगाप्रसाद यादव छन् ।
