काठमाडौं । प्रधानमन्त्री शेरबहादुर देउवाले मन्त्रिपरिषद विस्तारको तयारी गर्नुभएको छ । जनता समाजवादी पार्टी (जसपा) को आधिकारिकता विवाद टुंगिएकोले मन्त्रिपरिषद विस्तार गर्न लागिएको प्रधानमन्त्री कार्यालय स्रोतले जनाएको छ ।
सत्ता साझेदार जसपाको आधिकारिकता पाएकोले उपेन्द्र यादव पक्ष सरकारमा जाने तयारीमा छ । उपेन्द्र यादवसहित कांग्रेस र माओवादी केन्द्रलाई समेटेर प्रधानमन्त्री देउवाले मन्त्रिपरिषद विस्तारको तयारी गर्नुभएको हो ।
सोही सन्दर्भमा प्रधानमन्त्री देउवा र नेकपा (माओवादी केन्द्र) का अध्यक्ष पुष्पकमल दाहाल प्रचण्डबीच मंगलबार भेटवार्ता भएको छ । प्रधानमन्त्रीको सरकारी निवास बालुवाटारमा भएको भेटवार्तामा मन्त्रिपरिषद् विस्तारसहितका विषयमा छलफल भएको बालुवाटार स्रोतले जनाएको छ ।
हाल प्रधानमन्त्री देउवासहित कांग्रेसबाट दुई मन्त्री र एक राज्यमन्त्री तथा माओवादी केन्द्रबाट दुई जना मन्त्री छन् ।
जसपा यादव पक्ष आधिकारिकता विवादका कारण सरकारमा जान सकिरहेको थिएन भने माओवादी र कांग्रेसलाई आकांक्षी धेरै भएका कारण मन्त्री बनाउन धौ धौ परिरहेको छ । हालै माओवादी अध्यक्ष प्रचण्डले आफ्ना सबै सांसदले मन्त्री बनाइदिन दबाब दिएका कारण आफू तनावमा रहेको बताउनुभएको थियो ।
