नारायणगढ । अन्डाको मूल्य हालसम्मकै उच्च भएको छ । त्यसैगरी कुखुराको चल्ला र मासुको मूल्य लागतभन्दा बढेको छ । एवम् प्रकारले कुखुराजन्य क्षेत्रका सबै उत्पादनको मूल्य लागतभन्दा बढी भएको छ ।
गत वैशाखको पहिलो साताबाट ओरालो लागेको पोल्ट्री व्यवसायको कारोवार क्रमशः बढ्न थालेको हो । यही साउन महिनामा अन्डा, मासुको खपत कम हुने भनिए पनि माग बढेपछि मूल्यसमेत बढेको छ । निषेधाज्ञाका समयमा तीन साता ब्रोइलर चल्लाको बिक्री शून्य भएकोमा क्रमशः बढ्दै गएर प्रतिगोटा रु ७० पुगेको छ ।
साउन ११ गतेदेखि लागु हुने गरी अन्डाको फार्मरेट प्रतिक्रेट (३० वटाको) रु ३८५ र मिडियम प्रतिक्रेट रु ३५५ कायम गरिएको छ । नेपाल अन्डा उत्पादक सङ्घले लागु गरेको यो दर रेट हालसम्मकै उच्च हो ।
केन्द्रीय अध्यक्ष शिवराम केसीका मागअनुसार अन्डा पुर्याउन कठिन भएको बताए । हाल दैनिक ३३ लाख हाराहारी अन्डा उत्पादन भएको अनुमान छ । अन्य समयमा यो सङ्ख्या ४७ लाखसम्म पुग्ने गरेको उनले जानकारी दिए । निषेधाज्ञाका समयमा अन्डाको रेट प्रतिक्रेट रु ३३० सम्म झरेको थियो । हाल अन्डाको लागत मूल्य प्रतिक्रेट रु ३६० हाराहारी पर्ने उनको भनाइ छ । बजारको मागअनुसार दररेट बढाइएको उहाँले जानकारी दिए ।
अन्डाको मूल्य बढे पनि दानाको कच्चा पदार्थको दर उच्च हुँदा किसानले सोचे जस्तो मुनाफा नपाएका कृषक बताउँछन् । पोल्ट्री व्यवसायी मदन पोख्रेल कुखुराको दानामा प्रयोग हुने प्रतिकिलो रु ५० पर्ने भटमास रु १०५ सम्म पुगेको र रु २२ हाराहारीमा पाउने मकै रु ३७ सम्म पुगेको बताउँछन् ।
महङ्गोमा चल्ला राख्नुपर्दा लागत मूल्य बढी हुने उनी बताउँछन् । निषेधाज्ञाका समयमा कुखुराको मासुले मूल्य नपाउँदा धेरैले नोक्सानी बेहोर्नुपरेको छ ।
दुई वर्ष अस्ट्रेलियामा अध्ययन गरेर फर्कनुभएका गैँडाकोटका सम्भव पाण्डे निषेधाज्ञामा आफूले पालेका ३२ हजार ब्रोइलर कुखुराबाट रु २६ लाख नोक्सान भएको बताए ।
चितवन–नवलपुर दाना वितरक सङ्घका अध्यक्ष तेजनारायण पाण्डे ब्रोइलर कुखुराको किसानको लागत मूल्य रु २२० सम्म पर्ने भए पनि निषेधाज्ञाभर सस्तोमा बेच्नुपर्दा धेरै नोक्सान भएको बताउँछन् ।
लेयर्स कुखुरा पालनमा अग्रणी दाउन्ने ट्रेडर्सका कार्यकारी निर्देशक विनोदले पोख्रेल कच्चापदार्थको मूल्य दिनानुदिन बढ्दा र कोभिडजस्ता महामारीका समयमा यो व्यवसाय सञ्चालन कठिन हुने बताए । (रासस)
