काठमाडौँ । तीन स्थानीयतहमा अझै वाणिज्य बैङ्कको शाखा पुग्न सकेका छैनन् । नेपाल राष्ट्र बैङ्कले सार्वजनिक गरको चालु आर्थिक वर्षको एघार महिना (गत साउनदेखि जेठ मसान्तसम्म) को तथ्याङ्कअनुसार तीन स्थानीयतहमा अझै वाणिज्य बैङ्कका शाखा पुग्न नसकेका हुन् ।
बैङ्कका अनुसार हालसम्म ७५० स्थानीय तहमा बैङकिङ पहुँच पुगेको छ । कुल ७५३ स्थानीय तहमध्ये २०७८ जेठसम्म ७५० मा वाणिज्य बैङ्कका शाखा विस्तार भएका छन् । २०७७ जेठसम्म ७४६ स्थानीय तहमा वाणिज्य बैङ्कका शाखा विस्तार भएका थिए ।
वाणिज्य बैङ्क नपुगेका स्थानीय तहमा धादिङको रुबिभ्याली गाउँपालिका, जाजरकोटको जुनिचाँदे गाउँपालिका र बझाङको साइपाल गाउँपालिका छन् ।
जेठ मसान्तमा हाल राष्ट्र बैङ्कबाट इजाजत प्राप्त बैङ्क तथा वित्तीय संस्थाको सङ्ख्या १३८ रहेको छ । त्यसमध्ये २७ वाणिज्य बैङ्क, १८ विकास बैङ्क, २० वित्त कम्पनी, ७२ लघुवित्त वित्तीय संस्था र एक पूर्वाधार विकास बैङ्क सञ्चालनमा छन् ।
२२० बैंक तथा वित्तीय संस्था मर्ज
बैङ्कको तथ्याङ्कअनुसार चालु आर्थिक वर्ष २०७७÷७८ को जेठसम्म २२० बैङ्क तथा वित्तीय संस्था मर्जर/प्राप्ति प्रक्रियामा सामेल भएका छन् ।
वित्तीय स्थायित्व सुदृढीकरण गर्ने उद्देश्यले यस बैङ्कले बैङ्क तथा वित्तीय संस्था गाभ्ने/गाभिने तथा प्राप्तिसम्बन्धी प्रक्रिया सुरु गराएपश्चात् २०७८ जेठ मसान्तसम्म कुल यसमध्ये १६६ संस्थाको इजाजत खारेज हुन गई ५४ संस्था कायम भएको राष्ट्र बैङ्कले उल्लेख गरेको छ ।
