काठमाडौं । नेपाली कांग्रेसका सभापति शेरबहादुर देउवाले आज प्रधानमन्त्री पदको शपथ लिँदै हुनुहुन्छ । देशको कार्यकारी प्रमुखका रुपमा देउवा पाँचौ पटक प्रधानमन्त्री बन्न लाग्नु भएको हो ।
हाल ७६ वर्षीय देउवा पहिलोपटक ४९ वर्षको उमेरमा २०५२ भदौ २७ गते मुलुकको प्रधानमन्त्री नियुक्त हुनुभएको थियो । त्यसैगरी २०५८ साउन ११ मा दोस्रो, २०६१ जेठ २१ मा तेस्रो र २०७४ जेठ २४ मा देउवा चौथो पटक प्रधानमन्त्री बन्नुभएको थियो ।
सर्वोच्च अदालतको आदेश अनुसार मंगलबार राष्ट्रपति विद्यादेवी भण्डारीले देउवालाई प्रधानमन्त्री नियुक्त गर्नुहुने छ । सोमबार सर्वोच्च अदालतले २८ घण्टाभित्र देउवालाई प्रधानमन्त्री नियुक्त गर्न राष्ट्रपतिलाई परमादेश दिएको थियो ।
आजै देउवाले कांग्रेस र माओवादी केन्द्र सम्मिलित सानो आकारको मन्त्रिमण्डल गठन गर्नु हुनेछ । स्रोतका अनुसार तत्काल नेपाली कांग्रेसबाट दुई र माओवादीबाट दुई जना सहभागी हुनेछन् । गठबन्धनमा रहेको जनता समाजवादी दलले भने पार्टी भित्रको विवाद निरुपणपछि सरकारमा सामेल हुने बताउँदै निर्वाचन आयोगको फैसला कुर्ने भएको छ ।
