काठमाडौं । नेकपा (एमाले)का वरिष्ठ नेता माधवकुमार नेपालले अध्यक्ष केपी ओलीले एकताको प्रयासलाई भंग गर्न खोजेको आरोप लगाउनुभएको छ ।
सामाजिक सञ्जालमा आफ्नो धारणा राख्दै नेता नेपालले कर्णाली प्रदेशका सांसद एवम् पार्टीका नेताहरूमाथि विधान विपरित गरिएको कारबाहीलाई अदालतले उल्ट्याएपछि ओली फेरि भ्याकेटमा जानुले एकता नचाहेको पुष्टी भएको दाबी गर्नुभएको छ ।
‘कर्णाली प्रदेशका सांसद एवम् पार्टीका नेताहरूमाथि विधान विपरित गरिएको कारबाहीलाई अदालतले उल्ट्याएपछि फेरि भ्याकेटमा जाने निर्णयबाट पार्टीलाई एकता भंग गर्ने दिशामा लग्न खोजिएको प्रस्ट बुझ्न सकिन्छ’ नेपालले भन्नुभएको छ ।
कर्णाली प्रदेशमा पार्टीको फ्लोर क्रस गरेर मुख्यमन्त्री महेन्द्रबहादुर शाहीको पक्षमा मतदान गरेका प्रकाश ज्वालासहित चार सांसदलाई एमाले (ओली पक्ष) ले कारबाही गरेको थियो । उनीहरुलाई सर्वोच्च अदालतले पुर्वहाली गरिदिएको छ । सोही निर्णविरुद्ध ओली पक्ष पुनः भ्याकेटमा जाने निर्णय गरेकोमा नेता नेपाल आक्रोशित बन्नुभएको हो ।
नेता नेपालले आफूहरुले एकता बचाउन गरेको प्रयासलाई कमजोरीको रुपमा नलिन चेतावनीसमेत दिनुभएको छ । उहाँले ‘एकता विरोधी तत्वहरुसँग सावधान हुन’ पनि नेता कार्यकर्तालाई आव्हान गर्नुभएको छ ।
नेपालले लेख्नुभएको छ, ‘स्थायी समितिका नेतामाथि कथित कारबाही, फेरि उहाँहरुसँगै वार्ता पनि गर्ने दोहोरो चरित्रले विभिन्न शंका उब्जाएकै थियो । जिम्मेवार भएर पार्टी एकता बचाउन अधिकतम लचक भएर प्रस्तुत हुँदा त्यसलाई कमजोरीका रुपमा लिएको जस्तो देखियो ।’
नेपालले सत्ता जोगाउन संविधानका विरोधी र दक्षिणपन्थी तत्वसँग ओलीले आत्मसमर्पण गरेको आरोपसमेत लगाउनुभएको छ । त्यसैगरी एकताविरोधी हर्कतलाई जारी राख्ने कुराले एकताबद्ध पार्टी बनाउने प्रयासविरुद्ध को कुन रूपमा लागेको छ –सहजै देख्न सकिने उहाँले बताउनुभएको छ ।
नेपालले भन्नुभएको छ, ‘असल नियतका साथ गरिएका अनौपचारिक वार्ता र सम्वादलाई रणनीतिका रुपमा प्रयोग गर्नेहरु र एकता विरोधी तत्वहरूसँग सावधान हुन सबैको ध्यानाकर्षण गर्न चाहन्छु ।’
