काठमाडौं । राष्ट्रिय जनमोर्चाले ढुंगा, गिट्टी, बालुवा लगायत खानीजन्य पदार्थ निकासी गर्ने सरकारको योजनाप्रति आपत्ति जनाएको छ । बजेटमार्फत सरकारले बनाएको यो योजना ‘विनासकारी’ रहेको भन्दै तत्काल फिर्ता लिन राजमोले माग गरेको छ ।

गएको शनिबार अर्थमन्त्री विष्णु पौडेलले प्रस्तुत गरेको आगामी आर्थिक वर्षको बजेटमा ‘खानीजन्य ढुंगा, गिटी, बालुवा निकासी गरी व्यापार घाटा न्यूनीकरण गरिने’ योजना सार्वजनिक भएपछि त्यसको चौतर्फी विरोध भएको छ ।

राजमो उपाध्यक्ष एवम् प्रवक्ता दुर्गा पौडेलले बुधबार प्रकाशित गर्नुभएको विज्ञप्तिमा ‘प्राकृतिक सम्पदा र खानीजन्य पदार्थहरुलाई तस्करहरु र माफियाको हातमा सुम्पेर देशको वातावरणीय विनास गर्ने सरकारको योजनाको भत्र्सना गर्दै बजेटमा उल्लेख गरिएको विनाशकारी योजना खारेज गर्न जोडदार माग’ गरिएको छ ।

यस्तो छ प्रेस वक्तव्य
सरकारले २०७८/७९ को बजेट वक्तव्यमा ‘खानीजन्य ढुंगा, गिटी, बालुवा निकासी गरी व्यापारघाटा न्यूनीकरण गरिने’ योजनाप्रति हाम्रो पार्टीको गम्भीर ध्यानाकर्षण भएको छ । प्राकृतिक सम्पदा र खानीजन्य पदार्थहरुलाई तस्करहरु र माफियाको हातमा सुम्पेर देशको वातावरणीय विनास गर्ने सरकारको योजनाको भत्र्सना गर्दै बजेटमा उल्लेख गरिएको विनासकारी योजना खारेज गर्न जोडदार माग गर्दछौं ।

जथाभावी चुरे दोहन भएकाले अहिले तराइका कैयौं मूलहरु सुकेका कारण खानेपानीको संकट देखिएको छ । वर्षाको समयमा बाढीपहिरो आएर तराईको धेरै क्षेत्र डुबानमा पर्ने गरेको छ । चुरे दोहनकै कारण तराइको मात्रै नभएर देशकै पर्यावरणमा ठूलो संकट देखिएको छ । मानवजातिको लागिमात्रै नभएर सम्पूर्ण प्राणीजगतको लागि अत्यावश्यक पर्यावरणमा सरकारले गम्भीर लापरवाही र अपराध गरेको छ ।

नेपालको पूर्वी क्षेत्रदेखि पश्चिमसम्म फैलिएको प्राकृतिक तथा पर्यावरणीय चुरेक्षेत्र निकै संवेदनशील छ । चुरे क्षेत्रमा कमजोर भूबनोट र खुकुलो चट्टान छ भने महाभारतबाट बग्ने नदीहरु चुरे क्षेत्रभएर बग्ने गर्दछन् । २०७१ सालदेखि पूर्ण रुपमा बन्द गरिएको ढुंगा गिटी निकासी एकाएक खोलिनु र विदेश निकासी गर्ने योजना ल्याइनु निकै रहस्यपूर्ण रहेको छ । सरकारको ढुंगा, गिटी र वालुवा निकासीको योजनाले चुरे क्षेत्रमा रहेको सम्पूर्ण तराई क्षेत्रको भूमिगत जलभण्डारको स्रोत र जैविक विविधताको खानीलाई नष्ट गर्नेछ र वातावरणीय सन्तुलनमा गम्भीर असर पार्नेछ ।

खानीजन्य प्राकृतिक स्रोतसाधनको दोहन रोकेर भू तथा पर्यावरणको संरक्षण गर्न, तराईलाई मरुभूमि हुनबाट बचाउन र देशको दीर्घकालीन क्षति हुन नदिन सरकारको खानीजन्य ढुंगा, गिटी, बालुवा निकासी गर्ने योजनाका विरुद्ध संघर्षमा उत्रिनका लागि वातावरणीय क्षेत्रमा काम गर्ने सम्पूर्ण संघसंस्था, चुरे र तराई क्षेत्रमा बसोबास गर्ने स्थानीय तथा सम्पूर्ण नेपाली जनतामा आह्वान गर्दछौं ।

२०७८ जेठ १९गते
दुर्गापौडेल
उपाध्यक्ष तथा प्रवक्ता

यो पनि :

ढुंगा, गिट्टी, बालुवा विदेश निकासी गरेर देश धनी बन्दैन : डा. आचार्य

‘खानीजन्य पदार्थ निकासी भए तराई मरुभूमि बन्न सक्छ’