काठमाडौं । प्रधानमन्त्री केपी शर्मा ओलीले सरकारले संसदमा टेबल गरेको एमसीसी निर्णयार्थ प्रस्तुत गर्न नदिइएको भन्दै सभामुख अग्निप्रसाद सापकोटाप्रति असन्तुष्टि जनाउनुभएको छ ।

नयाँ वर्ष २०७८ सुरु भएको दिन बुधबार बिहान देशवासीका नाममा सम्बोधन गर्दै प्रधानमन्त्री ओलीले सरकारले टेबल गरेको एमसीसी निर्णयार्थ प्रस्तुत हुन नदिएर जिद्दीपना देखाइएको आरोप लगाउनुभएको हो ।

‘नेपाली कंग्रेस र नेकपा माओवादी सरकारमा हुँदा एमसीसी सम्झौता गरिएको थियो । त्यो निर्णयार्थ हामीले संसदमा टेबल गरेका छौं । तर टेबलमा निर्णयार्थ प्रस्तुत गरिएको छैन,’ उहाँले भन्नुभयो, ‘हामी त्यसको माग गरिरहेका छौं । त्यसरी सरकारले प्रस्तुत गरिसकेपछि निर्णयार्थ प्रस्तुत नगर्ने संवैधानिक अधिकार कसैसँग हुँदैन ।’

संविधानबमोजिम सरकारलाई संसद्मा अध्यादेश प्रस्तुत गर्न नदिएर अनौठो परिस्थिति सिर्जना गरिएको उहाँले बताउनुभयो । उहाँले मुद्दा लडेर ल्याएको संसद चल्न नदिएको भन्दै विपक्षीप्रति कटाक्षसमेत गर्नुभयो ।

‘अचम्म ! मुद्दा लडेर ल्याएको संसद् चल्न नदिएर, संविधानले भनेको पहिलो दिन प्रस्तुत गर्नपर्ने संसद्मा प्रस्तुत गर्न नदिएर एउटा अप्रिय र अशोभनीय स्थितिको निर्माण भएको छ’ ओलीले भन्नुभयोे, ‘त्यो गर्नैपर्ने हुन्छ तर लानै नमान्ने जिद्दी गर्ने त्यो प्रवृत्ति हामी झेलिरहेका छौं । हामी चाहन्छौं फाटोको खेती होइन। आपसमा परस्परमा वैमनस्यता र घृणा होइन, आजको हाम्रो आवश्यकता राष्ट्रिय एकता हो ।’

प्रधानमन्त्री ओलीले कोभिड महामारी भए पनि वा राजनीतक संकट देखापरे पनि २०७७ उपलब्धिकै वर्ष रहेको दाबी गर्नुभयो ।

‘दशकौंदेखिको सपना मेलम्चीको पानी ल्याएर खुसी बाँड्न सफल भएका छौं । २०७७ साललाई निरर्थक हुन दिएनौं । महामारीको कठिन घडीबीच पनि अनलाइनमार्फत शिक्षा सञ्चालन गर्‍यौं’ उहाँले भन्नुभयो ।

यस्तै, प्रधानमन्त्री ओलीले हिंसात्मक गतिविधिमा लागेका समूहलाई मूलधारमा ल्याउन सफल भएको बताउनुभएको छ । व्यापार घाटा कम गर्दै लगिएको भन्दै गएको वर्षलाई सफलताको वर्ष नै मान्नुपर्ने उहाँले बताउनुभयो ।

उहाँले भन्नुभयो, ‘अघिल्लो वर्ष हामीले पृथकतावाद अन्त्य गरेर राष्ट्रियता एकता कायम गर्न सफलता हासिल गरेका थियौं । यस वर्ष हिंसाको बाटो लिइरहेको समूह (विप्लव) लाई शान्तिपूर्ण मार्गमा ल्याउन सफल भयौं। अब देशमा हिंसाको राजनीति छैन । अर्थात् हिंसाका माध्यमबाट राजनीतिक उद्देश्य प्राप्ति गर्ने कुनै समूह छैन ।

सम्बोधनमा प्रधानमन्त्री ओलीले खासगरी दोस्रोपटक बढिरहेको कोरोना संक्रमणबाट बच्न सतर्कताका उपाय अपनाउन आम नागरिकलाई विशेष अपिल गर्नुभएको छ ।