काठमाडौं । पूर्व नेकपाको खारेजीसँगै एमाले र माओवादी केन्द्र ब्युँताउने सर्वोच्च अदालतको फैसलाविरुद्ध माओवादी केन्द्रका अध्यक्ष पुष्पकमल दाहाल प्रचण्डले दिएको पुनरावलोकन निवेदन सर्वोच्चमा पेसी चढेको छ । पुनरावलोकन निवेदन बिहीबार प्रधानन्यायाधीश चोलेन्द्रशम्शेर जबरा, न्यायाधीश तेजबहादुर केसी र प्रकाशकुमार ढुंगानाको पूर्ण इजलासमा पेशी चढेको हो ।
आजको पेशीबाट सर्वोच्चले पुनरावलोकन निवेदन स्वीकार गर्ने वा खारेज गर्ने आदेश दिने जनाइएको छ ।
नामको मात्रै विवाद रहेको अवस्थामा एकता नै बदर गरिनु अनुचित भन्दै प्रचण्ड पुनरावलोकनका लागि सर्वोच्च जानुभएको हो । नेपाल कम्युनिस्ट पार्टी (नेकपा) अध्यक्ष ऋषि कट्टेलले एकता बदर गर्नुपर्ने माग नै नगरेको प्रचण्डको तर्क छ ।
सर्वोच्च अदालतले फागुन २३ गते फैसला सुनाउँदै नेकपा नाम ऋषि कट्टेलको हुने तथा नेकपा एमाले र माओवादी केन्द्रबीच भएको एकताबारे निर्वाचन आयोगको निर्णय बदर गर्दै साविककै पार्टी ब्युँताएको थियो ।
