काठमाडौं । प्रधानमन्त्री केपी शर्मा ओलीले नेकपा एमालेका नेताद्वय माधवकुमार नेपाल र भीम रावलले बुझाएको स्पष्टिकरण नकारात्मक भएकाले कारबाहीको भागिदार रहेको बताउनुभएको छ । शुक्रबार प्रधानमन्त्री निवास बालुवाटारमा बसेको नेकपा(एमाले)को संसदीय दलको बैठकमा ओलीले अरु दुई जना (घनश्याम भुसाल) र सुरेन्द्र पाण्डेको स्पष्टिकरण सकारात्मक आउनेमा आफू विश्वस्त रहेको बताउनुभयो ।
एमालेले गुटबन्दीमा संलग्न भएको आरोपमा वरिष्ठ नेता माधवकुमार नेपाल, उपाध्यक्ष भीम रावल, उपमहासचिव घनश्याम भुसाल र स्थायी समिति सदस्य सुरेन्द्र पाण्डेलाई स्पष्टकरण सोधेको थियो । नेपाल र रावलले स्पष्टिकरण दिएपनि भुसाल र पाण्डेको आउन बाँकी रहेको एमालेले जनाएको छ ।
प्रधानमन्त्री ओलीलाई उदृत गर्दै संसदीय दलका प्रमुख सचेतक विशाल भट्टराईले भन्नुभयो, ‘दुई जनाको स्पष्टिकरण आएको छ । त्यो स्पष्टिकरण अत्यन्त नकारात्मक छ । त्यो कारबाहीको भागिदार छ । प्रधानमन्त्रीले भनेको शब्द त्यही नै हो । अरु बाँकी दुई जनाको त्यो कोणबाट नभइकन अत्यन्तै सकारात्मक कोणबाट र त्यो स्पष्टिकरणबाट चाहीँ पार्टीलाई एकढिक्का राख्न मद्दत पुगोस् । त्यस्ता आसयका साथ स्पष्टिकरण आउने अपेक्षा गर्दछु भनेर पनि प्रधानमन्त्रीले भन्नुभएकोछ त्यसकारण दुईवटा आएका स्पष्टिकरणहरु चाहीँ कारबाहीका भागिदार हुन्छन् भनेर उहाँले भन्नुभएको छ । कारबाही कुन प्रकृतिको हुन्छ भन्नेकुरा चाहिँ केन्द्रीय कमिटीको आधिकारीक बैठकले निर्णय गर्छ ।’
बैठकमा प्रधानमन्त्री ओलीले नेकपा(एमाले)ले फागुन २८ गतेपछि गरेका निर्णयहरु फिर्ता नहुने बताउनुभयो । चैत्र ५ गते र चैत्र ७ गतेको संसदीय दलको बैठकले गरेको निर्णयबाट पनि ब्याक हुन नसकिने उहाँको भनाई छ । उहाँले पार्टीको विधान केन्द्रीय कमिटीले अनुमोदन गरिसकेको भन्दै त्यसलाई परिवर्तन गर्न नसकिने स्पष्ट पारेको पनि प्रमुख सचेतक भट्टराईले बताउनुभयो । प्रधानमन्त्री ओलीले नेकपा(एमाले)मा कुनै गुट र समूह नरहेकोले समूहगत रुपमा कसैसँग डिलिङ नगर्ने बताउनुभएको पनि प्रमुख सचेतक भट्टराईले बताउनुभयो ।
उहाँले भन्नुभयो ‘२८ गते भएका निर्णयहरु र त्यसपछि भएका संसदीय दलका बैठकहरु चैत्र ५ गते र चैत्र ७ गते भएको संसदीय दलको बैठकले गरेका निर्णयहरुबाट ब्याक हुन सकिदैनँ । बैठकमा केही साथीहरु अनुपस्थित हुनुभयो तर पार्टी विधिसम्मत् तरिकाले निर्णय गरेको कारणले गर्दा फिर्ता हुन सकिदैन भनेर भन्नुभयो । दोस्रो कुरा, हामीले पारित गरेको विधान केन्द्रीय कमिटीले अनुमोदनसम्म गरिसकेको अवस्थामा अब यो विधान हाम्रो पार्टीको संसदीय दलको विधान हो । आवश्यक प-यो भने समयक्रममा कालान्तरमा त्यसलाई संशोधन गर्न सकिन्छ । अपरिवर्तनिय र असंशोधनीय छैन तर अहिले नै यो विधानमा तलमाथि गर्न सकिदैन भन्ने कुरा पनि उहाँले प्रष्ट गरिसक्नुभएको छ भने । प्रधानमन्त्रीले हाम्रो पार्टीमा समुहगत वा गुटगत तरिकाले अब हामी कसैसँग डिलिङ गर्दैनौँ । नेकपा(एमाले)मा कुनै समुह वा गुटको अस्तित्व छैन ।’
बैठकमा नेपाल समूहका नेताहरु झलनाथ खनाल, घनश्याम भुसाल, योगेश भट्टराई, गोकर्ण विस्टले पनि सहभागी थिए ।
