काठमाडौँ । नेकपा (मसाल) ले सरकारसित संवादका लागि नेकपा (विप्लव) पक्ष सकारात्मक भएकोमा प्रसन्नता व्यक्त गरेको छ ।
सरकार र नेकपा (विप्लव) पक्षमाझ वार्ताद्वारा समस्याको हल खोज्नु नै तात्कालिक परिस्थितिमा देश र जनताको पक्षमा हुने भन्दै नेकपा (मसाल) ले प्रसन्नता व्यक्त गरेको हो ।
महामन्त्री मोहनविक्रम सिंहको हस्ताक्षरमा २०७७ फागुन १० गते प्रसारित प्रेसवक्तव्यमा पार्टीको सो धारणा व्यक्त भएको हो ।
वक्तव्यको पूर्ण पाठ यस्तो छ–
“नेकपा (विप्लव) ले सरकारसँग संवाद र वार्ताका लागि सकारात्मक भएको भनी सार्वजनिक गरेको कुराप्रति हामीले प्रसन्नता व्यक्त गर्दछौँ ।
उक्त सङ्गठनमाथि सरकारले लगाएको प्रतिबन्धको हाम्रो पार्टीले सुरुदेखि नै विरोध गर्दै आएको छ । हामीले सरकारलाई उक्त सङ्गठनमाथिको प्रतिबन्ध हटाउनुपर्नेमा जोड दिन्छौँ । अब त्यो सङ्गठन र सरकारका बिच वार्ताको सम्भावना बढेर गएको छ । वार्ताको प्रक्रियाबाट त्यो सङ्गठनमाथिको प्रतिबन्ध हट्न गएमा त्यो स्वागतयोग्य हुने छ । त्यसरी हल खोजियो भने त्यो नै तात्कालिक परिस्थितिमा देश र जनताको हितमा हुने छ भन्ने हाम्रो विश्वास रहेको छ ।
विप्लव र सरकारका बिचमा वार्ता हुन्छ भने र त्यसरी वार्ता भएर त्यसको परिणाम कुन रूपमा आउँछ ? त्यसबारे अहिले नै भन्न सकिने अवस्था छैन । तर त्यसपछि उक्त सङ्गठनले कुन प्रकारको नीति अपनाउने छ ? त्यस आधारमा नै उनीहरूसितको हाम्रो नीति निर्धारित हुने छ ।”
