टेकराज भुसाल, बुटवल ।
बैतडीकी किशोरी भागरथी भट्टको बलात्कारी र हत्यारालाई कारबाहीको माग गर्दै राष्ट्रिय जनमोर्चा रुपन्देहीले बुटवलको बेलबासमा विरोधसभा सम्पन्न गरेको छ ।
माघ २६ गते आयोजित विरोधसभालाई सम्बोधन गर्दै राजमो केन्द्रीय सदस्य तथा लुम्बिनी प्रदेश सांसद तारा जिसीले तत्काल हत्यारा पत्ता लगाई कारबाही गर्न माग गर्नुभयो ।
उहाँले शान्तिपूर्ण प्रदर्शनका क्रममा आइतबार काठमाडौँमा विद्यार्थी तथा राजमोका नेताहरूलाई गिरफ्तारी गरिएको भन्दै आपत्ति पनि प्रकट गर्नुभयो ।
कार्यक्रमलाई नेकपा (मसाल) रुपन्देही प्रवक्ता नारायण जिसी र राजमो रुपन्देही सचिव टानबहादुर केसीले पनि सम्बोधन गर्नुभएको थियो ।
प्रदर्शनमा निर्मला पन्त र भागरथी भट्टका बलात्कारी र हत्यारालाई कार्बाही गर, सम्पूर्ण बालिकाको सुरक्षा गर, सरकारी उदासिनता मुर्दावादजस्ता नारासहित बेलबासको शिवालय चोकदेखि बेलबास चोकसम्म जुलुस निकालिएको थियो ।
