काठमाडौं । प्रधानमन्त्री केपी शर्मा ओलीले नेकपा अध्यक्ष पुष्पकमल दाहाल प्रचण्डले फेरि हिंसा चाहेको आरोप लगाउनुभएको छ । नेकपाले शुक्रबार काठमाडौंमा गरेको आमसभालाई सम्बोधन गर्दै प्रधानमन्त्री ओलीले प्रचण्डले हिंसात्मक आन्दोलन चाहेको आरोप लगाउनुभएको हो ।
शाहाकारी आन्दोलनले पुगेन, अब मांशाहारी आन्दोलन आवश्यक छ’ भन्ने प्रचण्डको अभिव्यक्तिलाई लिएर प्रचण्डले नरभक्षी आन्दोलन चाहेको आरोप लगाउनुभएको हो ।
‘शाकाहारी आन्दोलनले हुँदैन भनेको, चिकन चिल्ली खाने भनेको हो’, प्रधानमन्त्री ओलीले भन्नुभयो, ‘उहाँहरुले नरभक्षी आन्दोलन गर्न खोजेको हो । नरभक्षी आन्दोलनका दिन गए । अब नेपालमा कसैले हिंसा मच्चाउन सक्दैन ।’
प्रधानमन्त्री ओलीले अतिक्रमित भूमी समेटेर नक्सा बनाएको दिनदेखि नै आफूलाई प्रधानमन्त्रीबाट हटाउने खेल सुरु भएको दाबी पनि गर्नुभयो ।
नक्सा छापेदेखि नै केही व्यक्तिहरु केपी ओलीलाई प्रधानमन्त्री पदबाट नहटाइ नहुने अवस्थामा पुगेको र षडयन्त्र सुरु गरेको प्रधानमन्त्री ओलीको दाबी थियो ।
‘पहिलो कार्यकालमा चीनसँग पारवहन सम्झौता गरेलगत्तै मलाई प्रधानमन्त्री पदबाट हटाइयो’ उहाँले भन्नुभयो, ‘अहिले नक्सा छापेपछि कतिपय मानिसहरुलाई केपी ओलीलाई नहटाइ नहुने भएको छ। संविधान संशोधन गरेकै दिनदेखि उनीहरु मलाई हटाउन खोजेका थिए ।’
प्रधानमन्त्री ओलीले आज राजधानीमा आयोजना गरेको सभा इतिहासकै ठूलो सभा भएको दावी पनि गर्नुभयो ।
‘इतिहासकै कहिल्यै नभएको, इतिहासकै सबैभन्दा ठूलो सभा पहिलोपल्ट आज काठमाडौँमा भइरहेको छ’, ओलीले भन्नुभयो, ‘यो इतिहासकै ठूलो जनसभा हो ।’
उहाँले आफ्नो पार्टीको आमसभालाई असफल बनाउन आमहड्ताल लगायतका कार्यक्रम गरे पनि सचेत जनता उपस्थित भएको दाबी पनि गर्नुभयो ।
