काठमाडौँ । प्रधानमन्त्री केपी शर्मा ओली विरुद्ध सर्वोच्च अदालतमा अदालतको अपहेलनासम्बन्धी मुद्दा दर्ता भएको छ ।
अधिवक्ता डा. कुमार शर्मा आचार्य र अधिवक्ता कञ्चनकृष्ण न्यौपानेले प्रधानमन्त्री ओली विरुद्ध दायर गरेको मुद्दा सर्वोच्च प्रशासनले आज (मंगलबार) दर्ता गरेको हो ।
९४ वर्षीय वकिल कृष्णप्रसाद भण्डारीले संवैधानिक इजलासमा प्रतिनिधि सभा विघटन विरुद्ध परेका रिटमाथिको सुनुवाइमा बहस गरेको विषयमा प्रधानमन्त्री ओलीले दिएको अभिव्यक्तिले अदालतको अपहेलना भएको निवेदकको ठहर छ ।
यही माघ ९ गते प्रधानमन्त्री ओलीले कार्की बेन्क्वेटमा आयोजित पार्टी कार्यकर्ता भेलालाई सम्बोधन गर्दै भण्डारीलाई ‘बाजे’ र संवैधानिक इजलासमा भइरहेको बहसलाई लक्षित गर्दै ‘तमासा’ भन्नुभएको थियो । प्रधानमन्त्रीको सो भनाइ विरुद्ध आचार्यले आइतबार र न्यौपानेले सोमबार मुद्दा दायर गर्नुभएको थियो ।
प्रधानमन्त्रीको उक्त अभिव्यक्तिको कानुन व्यवसायी, राजनीतिक दलका नेता, नागरिक समाजलगायतबाट चर्को विरोध भइरहेको छ ।
