काठमाडौँ । भारतीय टेलिभिजन जीन्युजले सरगरमाथालाई भारतीय नाम दिने अभियान चलाएपछि अखिल नेपाल युवक सङ्घले त्यसको विरोध गरेको छ ।
युवक सङ्घका अध्यक्ष अनिलकिशोर घिमिरेको हस्ताक्षरमा २०७७ पुस २९ गते जारी प्रेसवक्तव्यमा यस्तो विरोध गरिएको हो ।
नेपालको सार्वभौमिकताको विरुद्ध अभिव्यक्ति दिने जीन्युजजस्ता च्यानललाई प्रतिबन्ध लगाउन माग गरिएको उक्त प्रेसवक्तव्यको पूर्ण पाठ यस्तो छ
“भारतीय टेलिभिजन च्यानल जीन्युजले विश्वको सर्वोच्च शिखर सगरमाथालाई भारतीय नाम दिने अभियान थालेकोप्रत िहाम्रो गम्भीर ध्यानाकर्षण भएको छ।
नेपालका प्रधानमन्त्री केपी शर्मा ओलीको अन्तरवार्ता लिएर भर्खर फर्किएका जीन्युजका सम्पादक सुधीर चौधरीले नै नेपाल आएका बेला हेलिकप्टरबाट सगरमाथा आधार शिविर पुगेर उक्त अभियान सुरु गरेको बताउनु गम्भीर आपत्तिजनक विषय रहेको छ। भारतका राधानाथ सिकदरले सगरमाथाको उचाइ नापेकाले उनको नाममा सगरमाथाको नाम रहनुपर्ने दाबी उनको छ ।
प्रम ओलीसँग अन्तरवार्ताको नाममा बालुवाटार आएका सुधीर चौधरी एकाएक कालापथ्थर पुगी यस प्रकारको गतिविधिमा सहभागी कसरी भए ? किन त्यसका लागि वातावरण बनाइयो ? यसको उपयुक्त छानबिन गर्न माग गर्दछौँ । यसअघि जीन्युजले प्रम ओली र चिनियाँ राजदूत होउ यान्छीबिचको कपोल्कल्पित संवादसहितको आपत्तिजनक रिपोर्ट बजाएको थियो । त्यसको विरोधमा नेपालका केबल अपरेटरहरूले जीसहितका केही भारतीय च्यानलको प्रसारणमा रोक लगाएका थिए ।
अहिले त्यही विवादास्पद पत्रकार र टेलिभिजनसँग प्रधानमन्त्रीले अन्तरवार्ता दिनु र लगत्तै सोही टेलिभिजनले नेपालको राष्ट्रिय स्वाभिमानमाथि धावा बोल्नुले गम्भीर शङ्का उत्पन्न गराएको छ । केपी ओलीले चुनावी माहोल बनाउन राष्ट्रियताका कुरा गर्ने र पछि राष्ट्रघातका कार्यमा अग्रसर हुने गरेका उदाहरण प्रशस्त छन् । त्यसैको निरन्तरताको रूपमा यो घटना दोहोरिएको हो भने यसले मुलुकलाई ठुलो क्षति पुर्याउने छ। यस प्रकारका गतिविधिको घोर निन्दा गर्दै आपत्तिजनक समाचार प्रसारण गर्ने च्यानललाई रोक लगाउन माग गर्दछौँ; र, राष्ट्रघातीहरूको भण्डाफोर गर्न सबै राष्ट्रवादी जनतालार्इ आह्वान गर्दछौँ ।”
