नेपालगञ्ज । बाँकेका स्थानीयतह बालविवाहरहित हुनेतर्फ सक्रिय भएका छन् । किशोरी क्लबसँगको सहकार्यमा यहाँका स्थानीयतहले बालविवाहरहित समाज निर्माण गर्ने दावी गरेका छन् ।
खजुराको लगनशील किशोरी क्लबमा आयोजित एक कार्यक्रममा जिल्ला समन्वय समिति बाँकेका प्रमुख अजय श्रीवास्तवले जिल्ला परिषद्ले बालविवाहमुक्त जिल्ला घोषणा गर्ने प्रस्ताव पारित गरिसकेको जानकारी दिए ।
खजुरा गाउँपालिकाका अध्यक्ष किस्मतकुमार कक्षपति, उपाध्यक्ष एकमाया विक र नेपालगञ्ज उपमहानगरपालिका उपप्रमुख उमा थापामगरले बालविवाह न्यूनीकरण गर्दै बालविवाहमुक्त घोषणाबारे स्थानीयतहको तयारीबारे जानकारी गराए । खजुरा गाउँपालिकाका अध्यक्ष कक्षपतिले गाउँपालिकाको वडा नं १, २, ३ र ४ लाई बालविवाहमुक्त वडा घोषणा गर्ने तयारी भइरहेको बताए ।
बाँकेलाई बालविवाहमुक्त गर्न प्लान इन्टरनेसनल नेपालले जिल्लाका आठ वटै स्थानीय तहसँगको सहकार्यमा आगामी छ महिनाभित्र जिल्लाका कम्तीमा पनि २० वडालाई बालविवाहमुक्त घोषणा गर्ने तयारी गरेको बताइएको छ ।
