केपी विरही/युएई ।
युएई नेपाली एकता समाज अबुधावी क्षेत्रीय समिति र रक्तिम विभागको संयुक्त आयोजनामा डिसेम्बर ४, २०२० का दिन विरोधसभा सम्पन्न भएको छ ।
कार्यक्रममा सम्बोधन गर्दै प्रमुख अतिथि युएई नेपाली एकता समाजका महासचिव टिका नेपालीले सङ्घीयता र कोभिड–१९ को पीडा युएईमा रहने दाजुभाइ दिदिबहिनीहरूले पनि खेप्नुपरेको हुनाले देशमा राष्ट्रिय जनमोर्चाले चलाएको यो आन्दोलनलाई सहयोग र समर्थन गरिएको बताउनुभयो ।
कार्यक्रममा महिला विभाग केन्द्रीय समितिकी सदस्य सावित्रा खनाल, केन्द्रीय सदस्य तथा रक्तिम विभागका अतिथि राम अविरल र अर्जुन उपाध्यले पनि मन्तव्य राख्नुभएको थियो ।
क्षेत्रीय सचिव अर्जुन खनालको अध्यक्षतामा र महिला विभाग क्षेत्रीय समितिकी सचिव बिनु तामाङले सञ्चालनमा सो कार्यक्रम सम्पन्न भएको थियो।
दुबईमा पनि विरोधसभा
सोही दिन महिला विभाग केन्द्रीय विभागले दुबईमा सङ्घीयता विरुद्ध विरोधसभा सम्पन्न गरेको छ । “सङ्घीयता खारेज गरौँ, कोरोना भाइरस विरुद्ध प्रभावकारी कदम चालौँ” मूल नाराका साथ विरोधसभाको सम्पन्न भएको हो ।
कार्यकमको प्रमुख अतिथि एकता समाज केन्द्रीय सदस्य टेक थापा हुनुहुन्थ्यो । सो अवसरमा बोल्दै सदस्य थापाले सङ्घीयता हाम्रो देशबाट निमिट्यान्न नहुँदासम्म त्यसका विरुद्ध देश तथा विदेशबाट आन्दोलन जारी रहने बताउनुभयो । त्यसैगरी उहाँले सरकारले कोरोना भाइरसको रोकथाम तथा उपचारका लागि प्रभावकारी कदम चाल्न नसक्नुलाई सरकारको गैरजिम्मेवारीपनको सङ्ज्ञा दिनुभयो।
कार्यक्रमा विशिष्ट अतिथि केन्द्रीय सचिव केपी विरही, महिला विभागकी कोषाध्यक्ष गोमा ढुङ्गाना, सदस्य जनका खनाल, मन्जु ढुङ्गाना, अम्बिका गैरे, समाजसेवी किरण सापकोटाले पनि मन्तव्य राख्नुभएको थियो ।
युएई नेपाली एकता समाजअन्तर्गत महिला विभाग केन्द्रीय समितिकी अध्यक्ष बिनु केसीको अध्यक्षता तथा सचिव पार्वता केसीले सञ्चालनमा सो कार्यक्रम सम्पन्न भएको थियो । महिला विभागकी केन्द्रीय उपाध्यक्ष मिना घिमिरेले स्वागत गर्नुभएको थियो ।
