काठमाडौँ । विश्वव्यापी महामारीका रूपमा फैलिएको कोभिड–१९ सङ्क्रमणका कारण विश्वमा महिला विरुद्धको लैङ्गिक हिंसा वृद्धि भएको संयुक्त राष्ट्र सङ्घघका अधिकारीले सोमबार बताएका छन् ।
कोभिड–१९ का कारण विश्वका सबै स्थानमा महिला तथा बालबालिका विरुद्धको हिंसामा वृद्धि भएको राष्ट्र सङ्घीय लागूऔषध तथा अपराधबारे अनुसन्धान गर्ने राष्ट्र सङ्घीय कार्यालय (युनओडिसी) को अध्ययनले देखाएको छ, संस्थाका कार्यकारी निर्देशक घाडा वालाईले बताउनुभयो ।
संस्थाको प्रत्यक्ष भिडियो सम्मेलनमार्फत महिला र बालबालिका विरुद्धको प्रतिबद्धता नामक एक कार्यक्रममा उहाँले भन्नुभयो– “महामारीका कारण आपराधिक मुद्दा विरुद्धका गतिविधि अवरुद्ध बनेको र पीडितलाई हुने सहयोगमा कमी भएको कारण महिला तथा बालबालिका विरुद्धको लैंगिक हिंसाका घटना बढेको पाइएको छ ।”
महामारी पहिले पनि महिला तथा बालिका विरुद्ध विभिन्न खालका हिंसा हुनुपरेको स्मरण गर्दै उहाँले महामारीपछि यसमा ६० प्रतिशतभन्दा बढीले वृद्धि भएको युनओडिसीका बालाईले भन्नुभयो ।
कोभिड–१९ महामारीका समय लकडाउन र अन्य उपायका कारण लैङ्गिक हिंसामा प्रचूर मात्रामा प्रभाव परेको युएनओडिसीले जनाएको छ ।
राष्ट्र सङ्घीय महिला कार्यकारी निर्देशक फुम्जिले एमलाम्बोएनगुकाले सङ्क्रमणमा परी जीवन जोगाउन सफल अधिकांश (करिब ८० प्रतिशत) महिलाले यौन हिंसाको शिकार बन्नुपरेको बताउनुभयो ।
सामाजिक तथा आर्थिक अवस्थाका कारण पनि उनीहरूले ती अपराधको सामना गर्नुपरेको तर महामारीको समयमा उनीहरूमा सामाजिक तथा आर्थिक असर अझ जटिल बनेको एमलाम्बोएनगुकाले बताउनुभयो ।
कोभिड–१९ का कारण थप ७० लाख महिला तथा किशोरीमा जटिल खालको गरिबीतर्फ धकेलेको र महिला तथा बालबालिका बेचबिखन मौलाएको उहाँको दावी थियो ।
अप्रिलमा संयुक्त राष्ट्र सङ्घका महासचिव एन्टिनियो गुटेर्रेसले विश्वव्यापी घरेलु हिंसा ‘रोक्न’ महिलाको सुरक्षालाई प्राथमिकता दिन आग्रहसमेत गर्नुपरेको थियो ।
अहिलेसम्म झण्डै १५० राष्ट्रले महासचिव गुटेर्रेसको आग्रहलाई सम्मान गर्दै सङ्क्रमित महिला तथा बालबालिकालाई प्राथमिकतामा राखेको बताइएको छ । यसलाई युएनओडिसी, राष्ट्र सङ्घीय महिला एकाइ र अन्य सहयोगीले पनि पालना गरेको बताइएको छ ।
