काठमाडौं । अखिल नेपाल किसान महासंघका अध्यक्ष भैरवराज रेग्मीले अब किसान संघर्षलाई अब गाउँ केन्द्रित बनाउने बताउनु भएको छ ।
देशभरका जिल्ला प्रशासन कार्यालय तथा स्थानीय तहमार्फत बिहीबार सरकारलाई ध्यानाकर्षण पत्र बुझाएको किसान महासंघले अब ग्रामिण संघर्षलाई अघि बढाउने तयारी गरेको अध्यक्ष रेग्मीले बताउनुभयो । महासंघले एकल तथा चार किसान संगठनहरुको संयुक्त पहलमा आन्दोलन थाल्ने अध्यक्ष रेग्मीले जानकारी दिनुभयो ।
‘हामीले देशभरबाट सरकारको ध्यानाकर्षण गराएका छौं । अब सरकारले कस्तो प्रतिक्रिया दिन्छ, केही समय हेर्छौं’ रेग्मीले युगदर्शनसँग भन्नुभयो, ‘त्यसपछि गाउँ–नगर क्षेत्रलाई केन्द्रित गरी किसानका मुद्दा उठाउँछौं । चार किसान संगठनको संयुक्त पहलमा पनि आन्दोलन अघि बढ्छ ।’
अखिल नेपाल किसान महासंघले विभिन्न चार वामपन्थी किसान संगठनहरुसँग मिलेर किसानका समस्या उठाउँदै आएको छ । त्यसबाहेक एकल रुपमा पनि महासंघको आन्दोलन जारी छ ।
सोही सन्दर्भमा महासंघले बिहीबार देशभरका जिल्ला प्रशासन कार्यालयहरु तथा कयौं स्थानमा स्थानीय तहमार्फत समेत सरकारको ध्यानाकर्षण गराएको छ ।
महासंघले तत्काललाई गहुँको बिउ र मलको उचित प्रबन्ध गर्नुपर्ने, सिंचाइ तथा विद्युतको ब्यवस्थापन गर्नुपर्ने लगायतका माग राख्दै प्रधानमन्त्रीलाई ज्ञापन पत्र बुझाएर ध्यानाकर्षण गराएको हो ।
ज्ञापनपत्रमा गहुँ लगाउनुभन्दा पहिले मल र बिउको आपुर्ति गर्नुपर्ने, सिंचाइ तथा सिंचाइलाई चाहिने विद्युत महशुल शतप्रतिशत अनुदानको ब्यवस्था गर्नुपर्ने, धानको समर्थन मुल्य तत्काल लागू गर्नुपर्ने, भ्रष्टाचार र महंगी नियन्त्रण गर्नुपर्ने, कोरोना भाइरस संक्रमितको उपचार निशुल्क गर्न अदालतले गरेको निर्देशन कार्यान्वयनमा ल्याउनपर्ने, कोभिड १९ का कारण समस्यामा परेका किसानलाई उचित राहत तथा पूर्नःस्थापना गर्नुपर्ने, कृषि उत्पादनमा भइरहेको बिचौलिया प्रणाली बन्द हुनुपर्ने, किसानको उत्पादनलाई राज्यले नै किन्ने ब्यवस्था गर्नुपर्ने लगायतका माग समेटिएको छ ।
बिहीबार अध्यक्ष रेग्मीको नेतृत्वमा चितवन जिल्ला प्रशासन कार्यालयमार्फत सरकारलाई ज्ञापन पत्र बुझाइएको थियो । अध्यक्ष रेग्मीको नेतृत्वमा राजमो केन्द्रीय सचिव डम्बर पुरी, नेकपा (मसाल) का जिल्ला प्रवक्ता मेगराज ढकाल, अन्तर्रास्ट्रिय नेपाली एकता समाज केन्द्रीय सदस्य कृष्ण केसी लगायतका नेताहरु जिल्ला प्रशासन कार्यालय पुग्नुभएको थियो ।
