काठमाडौँ । कैदीबन्दी रामलखन जैसवालको मृत्यु प्रकरणमा वीर अस्पताल र केन्द्रीय कारागार कार्यालयले मृत्यु शङ्कास्पद नभएको प्रष्टीकरण दिएका छन् । असोज ३ गते राति ११ः५५ बजे मृत्यु भएका जैसवालको मृत्यु सामान्य ढङ्गबाटै भएको अस्पताल र केन्द्रीय कारागारले बताएका छन् ।
घटनाका विषयमा जानकारी दिन आज भएको पत्रकार सम्मेलनमा जेलर लक्ष्मीप्रसाद बास्कोटाले तीन दिनदेखि मृतकको शव, शवगृहमा राख्दा शवमा फोकाहरू रहेको, सुन्निएको तथा मुख र नाकबाट तरल पदार्थ देखिएको बताउनुभयो । शवलाई उपयुक्त रेफ्रिजिरेटरमा नराख्दा शवमा सो लक्षणहरु देखिएको उहाँले बताउनुभयो ।
सामाजिक सञ्जाल र सञ्चार माध्यमहरूमा हत्या गरी आँखा निकालिएको, चोटपटक लागेको, घाँटी काटिएकोजस्ता भ्रमक समाचारप्रति गम्भीर ध्यानाकर्षण भएको उल्लेख गर्दै उहाँले सिसिभिटी फुटेजबाट कारागारभित्र हत्या भएको भन्ने तथ्य गलत भएको र बाँकी पोस्टमार्टम रिपोर्टपछि थाहा हुने बताउनुभयो ।
वीर अस्पतालका निर्देशक डा. केदारप्रसाद सेन्चुरीले उपचारका लागि अस्पताल पुर्याइएका जैसवाल जीवित रहेको कुनै पनि लक्षण नरहेको बताउनुभयो । अस्पतालमा कुनै पनि प्रकारको उपचार नभए पनि पोस्टमार्टम गर्नुपर्ने भएकाले कारागारको आग्रहअनुसार पिसिआर परीक्षण गरिएको बताउनुभयो ।
वीर अस्पतालको शव राख्ने स्थान सामान्य कोठा भएको र गर्मी मौसम भएकाले शव सुनिने, फोका आउने, विभिन्न भागमा दाग देखिएको बताउनुभयो । बाहिर आएजस्तो शरीरमा कुनै चोटपटक भएको, आँखा निकालिएको भन्ने कुरा सहि नभएको उहाँले बताउनुभयो ।
अस्पतालको फरेन्सिक विभागमा कार्यरत डा. सुगम श्रेष्ठले तीन दिनपछि शव सुन्निएको, फोकाहरू देखिएको, मुख सुन्निएर चिन्नै नसकिने अवस्था भएको, जिब्रो बाहिर निकालेको र मुख र नाकबाट रगत बगेको देखिएको बताउनुभयो । भित्री समस्या के थियो भन्ने कुरा पोीटमार्टमपछि थाहा हुने उहाँले बताउनुभयो ।
