काठमाडौँ, कार्तिक २७ । मकवानपुरको भीमफेदी गाउँपालिका–६ स्थित चिसापानीगढीमा भएको भीषण सवारी दुर्घटनामा परी १० जना यात्रुको मृत्यु भएको घटनाप्रति राष्ट्रिय जनमोर्चाका महासचिव मनोज भट्टले गहिरो दुःख व्यक्त गर्नुभएको छ ।
महासचिव भट्टले आज कार्तिक २७ गते बिहीबार आफ्नो फेसबुकमार्फत शोक वक्तव्य सार्वजनिक गर्दै दुर्घटनामा ज्यान गुमाउने सबैप्रति भावपूर्ण श्रद्धाञ्जली अर्पण गर्नुभएको छ । साथै, शोकसन्तप्त परिवारजनप्रति गहिरो समवेदना व्यक्त गर्दै दुर्घटनामा घाइते भएकाहरूको शीघ्र स्वास्थ्यलाभको कामना गर्नुभएको छ ।
उहाँले घाइतेहरूको प्रभावकारी उद्धार, उपचार तथा आवश्यक सहयोगको व्यवस्था मिलाउन सरकारसँग आग्रहसमेत गर्नुभएको छ ।
सवारी दुर्घटनालाई केवल आकस्मिक घटनाका रूपमा मात्र हेर्न नहुने धारणा व्यक्त गर्दै महासचिव भट्टले सार्वजनिक यातायातसम्बन्धी गलत राष्ट्रिय नीतिका कारण मुलुकले निरन्तर मानवीय तथा भौतिक क्षति व्यहोर्नुपरेको उल्लेख गर्नुभएको छ ।
यस्ता दुर्घटनाको न्यूनीकरणका लागि यातायातसम्बन्धी विद्यमान राष्ट्रिय नीतिमा सुधार गर्नुपर्नेमा जोड दिँदै उहाँले अल्पकालीन तथा दीर्घकालीन रणनीति निर्माण गरी प्रभावकारी रूपमा कार्यान्वयन गर्नुपर्ने आवश्यकता औँल्याउनुभएको छ ।
सार्वजनिक यातायातलाई सुरक्षित, व्यवस्थित र भरपर्दो बनाउन राज्यले नीतिगत तथा संरचनागत सुधारमा विशेष ध्यान दिनुपर्ने उहाँको धारणा रहेको छ ।
