काठमाडौं, ३० असोज । नेपाली कांग्रेसको १५औँ महाधिवेशनबाट केन्द्रीय समितिका २३१ जना सदस्य निर्वाचित भएका छन् । काठमाडौंमा १८ असोजदेखि सुरु भएको महाधिवेशनको मतगणना सात दिनपछि सम्पन्न भएको हो ।
सभापति गगन थापाको नेतृत्वमा नयाँ कार्यसमिति बनेको छ । थापाले कुल सात हजार ३९ मतमध्ये ६ हजार ५८४ मत अर्थात् ९३.८८ प्रतिशत प्राप्त गरेका छन् ।
संशोधित विधानअनुसार २९७ सदस्यीय केन्द्रीय समितिमा २३१ जना निर्वाचित हुने र ६६ जनालाई सभापतिले मनोनीत गर्ने व्यवस्था छ । विधान संशोधनसँगै पदाधिकारीको संख्या बढाउनुका साथै समावेशितालाई प्राथमिकता दिइएको छ ।
वरिष्ठ उपसभापतिमा विश्वप्रकाश शर्मा, महिला उपसभापतिमा पुष्पा भुसाल र समावेशी उपसभापतिमा विनोद चौधरी निर्वाचित भएका छन् । खुला उपसभापतिमा चन्द्र भण्डारी र मधु आचार्य विजयी भएका छन् । महामन्त्रीमा प्रदीप पौडेल, उदयशमशेर राणा र डा. डिला संग्रौला निर्वाचित भएका छन् ।
त्यस्तै, ११ सहमहामन्त्री विभिन्न समावेशी समूहबाट निर्वाचित भएका छन् । खुला केन्द्रीय सदस्यतर्फ ललितपुर महानगरपालिकाका मेयर चिरिबाबु महर्जनले सर्वाधिक मत प्राप्त गरेका छन् । नयाँ विधानअनुसार ३५ वर्षमुनिका २१ जनासहित विभिन्न क्लस्टरबाट केन्द्रीय सदस्य चयन भएका छन् ।
