काठमाडौँ । राष्ट्रिय जनमोर्चाका कार्यवाहक महासचिव घनश्याम न्यौँपानेले मुलुकको वर्तमान राजनीतिक, आर्थिक तथा सामाजिक संकट समाधानका लागि राजनीतिक दलहरूबीच एकता र सहकार्य आवश्यक रहेको बताउनु भएको छ ।
नेपाली काँग्रेसको १५औँ महाधिवेशनमा राष्ट्रिय जनमोर्चाको तर्फबाट शुभकामना मन्तव्य व्यक्त गर्दै न्यौँपानेले जलवायु परिवर्तन, प्राकृतिक विपत्ति, सहकारी ठगी, डामाडोल अर्थतन्त्र तथा गणतन्त्रमाथि उत्पन्न चुनौतीलाई गम्भीरतापूर्वक लिनुपर्नेमा जोड दिनुभयो ।
महाधिवेशनमा राष्ट्रिय जनमोर्चालाई आमन्त्रण गरेकोमा नेपाली काँग्रेस केन्द्रीय कार्यसमितिलाई धन्यवाद दिँदै उहाँले महाधिवेशनले नीति, सिद्धान्त र विचारका विषयमा गहन छलफल गरी सक्षम र कुशल नेतृत्व चयन गर्न सकोस् भन्ने शुभकामना व्यक्त गर्नुभयो ।
उहाँले जलवायु परिवर्तनका कारण मुलुकमा बाढी–पहिरोलगायतका प्राकृतिक विपत्तिको जोखिम बढिरहेको उल्लेख गर्दै ठूलो मानवीय तथा भौतिक क्षति भइरहेको बताउनु भयो । यस्ता विपत्तिको सामना गर्न जलवायु परिवर्तनका असरविरुद्ध सबै राजनीतिक दलहरू एकताबद्ध भएर अघि बढ्नुपर्ने उहाँको भनाइ थियो ।
न्यौँपानेले नेपाली जनताले दुःख गरेर आर्जन गरेको अर्बौँ रुपैयाँ सहकारीका नाममा ठगी भएको उल्लेख गर्दै त्यसबाट उत्पन्न समस्याको समाधान गर्न राज्य गम्भीर बन्नुपर्ने बताउनु भयो । मुलुकको अर्थतन्त्रसमेत डामाडोल अवस्थामा पुगेको भन्दै उहाँले आर्थिक संकट समाधानका लागि प्रभावकारी कदम चाल्नुपर्ने आवश्यकता औँल्याउनु भयो ।
उहाँले युवा तथा विद्यार्थी आन्दोलनबाट प्राप्त गणतान्त्रिक व्यवस्थामाथि गम्भीर चुनौती उत्पन्न भइरहेको भन्दै यसको संरक्षणमा सबै लोकतान्त्रिक शक्तिहरू सचेत र जिम्मेवार बन्नुपर्ने जोड दिनुभयो ।
न्यौँपानेले नेपाली काँग्रेसको १५औँ महाधिवेशनबाट पारित हुने नीति तथा चयन हुने नेतृत्वले देशको लोकतान्त्रिक आन्दोलन र राजनीतिक व्यवस्थाको संरक्षण तथा विकासमा महत्वपूर्ण भूमिका निर्वाह गर्ने विश्वास व्यक्त गर्नुभयो ।
महाधिवेशनमा उपस्थित देशका विभिन्न जिल्ला तथा प्रवासबाट आएका प्रतिनिधि, न्यायप्रेमी जनसमुदाय, सञ्चारकर्मी तथा सुरक्षाकर्मीलाई राष्ट्रिय जनमोर्चाको तर्फबाट अभिवादन गर्दै उनले महाधिवेशनको पूर्ण सफलताको शुभकामना व्यक्त गर्नुभएको थियो ।
