सन्धिखर्क, असोज १४ । राष्ट्रिय जनमोर्चाका केन्द्रीय कोषाध्यक्ष एवम् नेकपा (मसाल) केन्द्रीय सल्लाहकार मधु कुमार क्षेत्री (का. राहुल) को निधन भएको छ ।
अर्घाखाँची जिल्ला सन्धिखर्क नगरपालिका–१० निवासी क्षेत्रीको आज असोज १४ गते उपचारका क्रममा निधन भएको हो।
विगत केही वर्षदेखि ब्लड क्यान्सर रोगबाट पीडित क्षेत्रीको उपचारका लागि पार्टी र परिवारका तर्फबाट अथक प्रयास गरिए तापनि उहाँलाई बचाउन नसकिएको पार्टीले जनाएको छ ।
वि.सं. २०३८ साल (४५ वर्ष अघि) देखि पार्टी सदस्यका रूपमा निरन्तर क्रियाशील क्षेत्रीले सांस्कृतिक एवम् प्रगतिशील साहित्यिक आन्दोलनमा महत्वपूर्ण योगदान पुर्याउनुभएको थियो । उहाँले रक्तिम सांस्कृतिक अभियान र प्रगतिशील लेखक संघमा केन्द्रीय भूमिका निर्वाह गर्नुभएको थियो भने प्रवास तथा स्वदेशका विभिन्न राजनीतिक जिम्मेवारी कुशलतापूर्वक सम्हाल्नुभएको थियो ।
यसैबीच नेकपा (मसाल)द्वारा जारी वक्तव्यमा भनिएको छ, “उहाँले इमान्दार, कर्मनिष्ठ, प्रतिबद्ध, जुझारु र अनुशासित रूपमा पार्टीको जिम्मेवारी निर्वाह गर्दै अन्तिम क्षणसम्म पनि आफ्नो सक्रियता कायम राख्नुभएको थियो ।”
उहाँको निधनबाट नेपालको सांस्कृतिक आन्दोलन, अर्घाखाँचीको कम्युनिस्ट आन्दोलन र राष्ट्रिय जनमोर्चालाई अपूरणीय क्षति पुगेको छ । पार्टीले उहाँको निधनप्रति गहिरो दुःख व्यक्त गर्दै मृतकप्रति हार्दिक श्रद्धाञ्जली र शोकसन्तप्त परिवारजन एवम् पार्टी सदस्यहरूप्रति समवेदना प्रकट गरेको छ ।
वक्तव्यको पूर्णपाठ :
अर्घाखाँची जिल्ला सन्धिखर्क नगरपालिका–१० निवासी कामरेड मधु कुमार क्षेत्री (का. राहुल) को आज २०८३ असोज १४ गते मृत्यु भएको छ । कामरेड मधु कुमार क्षेत्री गत केही वर्ष अगाडिबाट ब्लड क्यान्सर रोगबाट पीडित हुनुहुन्थ्यो । उहाँको उपचारको लागि पार्टी र परिवारको तर्फबाट धेरै प्रयास गरिएका थिए । ती सबै प्रयासहरूका बाबजुद पनि उहाँको जीवनलाई बचाउन हामीलाई सफलता प्राप्त भएन । अन्तमा हामीले उहाँलाई गुमाउनु परेको छ । उहाँको मृत्युप्रति हामीले गहिरो दु:ख व्यक्त गर्दै सन्तप्त परिवारजन र समस्त पार्टी सदस्यहरूप्रति हार्दिक समवेदना व्यक्त गर्दछौँ ।
का. मधु कुमार क्षेत्री अहिले हाम्रो पार्टीको केन्द्रीय सल्लाहकार हुनुहुन्थ्यो । उहाँ ४५ वर्ष अगाडिबाट हाम्रो पार्टीको सदस्य हुनुभएको थियो । उहाँले रक्तिमा सांस्कृतिक अभियान र प्रगतिशील लेखक सङघमा पनि केन्द्रीय भूमिका निर्वाह गर्नु भएको थियो । उहाँले आफ्नो राजनीतिक जीवनमा प्रवास र स्वदेशमा विभिन्न समयमा विभिन्न जिम्मेवारी निर्वाह गर्नुभएको थियो । उहाँ अहिले राष्ट्रिय जनमोर्चाको केन्द्रीय कोषाध्यक्ष जस्तो गहन जिम्मेवारीमा कार्यरत हुनुहुन्थ्यो । उहाँले इमान्दार, कर्मनिष्ठ, प्रतिवद्ध, जुझारु र अनुशासित रुपले पार्टीको जिम्मेवारी निर्वाह गर्नुभएको थियो । उहाँले अन्तिम क्षणसम्म पनि आफ्नो सक्रियतालाई कायम राख्नुभएको थियो । उहाँको मृत्युबाट सांस्कृतिक आन्दोलन, अर्घाखाँचीको कम्युनिस्ट आन्दोलन र हाम्रो पार्टीको आन्दोलनमा गम्भीर क्षति भएको छ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।
२०८३ असोज १४ गते ।
मोहनविक्रम सिंह
(महामन्त्री)
