काठमाडौँ । राष्ट्रिय जनमोर्चाका अध्यक्ष चित्रबहादुर केसीले राज्यसत्तामा बसेकाहरू नै ठगसँग मिल्दा २०७२ सालमा सहकारी ऐन बन्न नसकेको बताउनुभएको छ ।

राजमो महासचिवसमेत रहनुभएका मनोज भट्टको पुस्तक ‘सहकारीमा ठगीको जालो’ को समीक्षा कार्यक्रममा प्रमुख अतिथिको आसनबाट मन्तव्य राख्दै उहाँले सो धारणा राख्नुभएको हो ।

सिर्जना डबलीको आयोजनामा २०८३ असोज १० गते भर्चुअल माध्यमबाट आयोजित कार्यक्रममा मन्तव्य राख्दै उहाँले भन्नुभयो– ‘२०७२ सालमा ऐन बनाउँदा राज्यसत्तामा बसेकाहरू नै सहकारी माफियासित मिले । त्यसैले गर्दा ऐन बनेन ।’

अध्यक्ष केसी त्यति बेला आफू सहकारी तथा गरिबी निवारणमन्त्री रहेको र सहकारी ठगी न्यूनीकरण गर्न सहकारी ऐन ल्याउन खोज्दाको अनुभव सुनाउँदै हुनुहुन्थ्यो ।

‘सहकारी ऐन बनाउन खोज्दा राज्यसत्तामा बसेकाहरूले नै तगारो हाले’ उहाँले भन्नुभयो– ‘सहकारी माफियाहरू सहकारीको नाममा हालीमुहाली गरिरहेका थिए । उनीहरू सहकारी सिद्धान्तको विरुद्धमा काम गरिरहेका थिए ।’

कतिपय सरकारमा बसेकाहरू नै सहकारी माफियासँग मिलेका कारण जनता बेबारिसे भएको उहाँको अनुभव थियो । उहाँले त्यसैकारण अहिलेसम्म सर्वसाधारणको अर्बौं रुपियाँ हिनामिना भएको बताउनुभयो ।

उहाँले भन्नुभयो– ‘अहिले सरकारमा बसेकाहरूमध्ये कतिपय सहकारी ठगी गरेर आएका हुन् ।’

पूर्व सहकारीमन्त्रीसमेत रहनुभएका केसीले जसले सहकारी ठगीको आरोप खेपिरहेको छ, तिनैसँग सहकारीपीडितले न्यायको आशा गर्नु विडम्बनाको विषय भएको बताउनुभयो ।

आफूहरू सहकारीपीडित जनताको पक्षमा रहेको स्पष्ट पार्दै उहाँले ठोस सहकारी ऐन आयो भने सत्तामा बस्नेहरूलाई नै समस्या पर्ने भएकाले ऐन बनाउन नदिइएको दाबी गर्नुभयो ।

अहिलेको सरकारले पनि पहिले र अहिलेका सहकारी ठगलाई सघाइरहेको आरोप अध्यक्ष केसीले लगाउनुभयो ।

लेखक भट्टले सहकारी ठगीको भण्डाफोर गरेर राम्रो काम गरेको बताउँदै उहाँले सहकारी ठगीको पर्दाफास गर्ने काम अगाडि बढाउनुपर्ने बताउनुभयो ।