काठमाडौँ । राष्ट्रिय जनमोर्चाका केन्द्रीय कोषाध्यक्ष मधुकुमार क्षेत्रीले आफ्नो जीवनको लामो समय राजनीतिक आन्दोलन, संगठन निर्माण, सांस्कृतिक मोर्चा र पार्टीका विभिन्न जिम्मेवारीमा बिताउनु भएको थियो । भारतको कलकत्तामा सन् १९५५ मा जन्मिनुभएको क्षेत्रीले २०३५–३६ सालको आन्दोलनबाट सक्रिय राजनीतिक यात्रा सुरु गर्नुभएको थियो ।
युगदर्शनलाई दिएको भिडियो अन्तर्वार्तामा क्षेत्रीले राजनीतिक आन्दोलनमा सहभागिताका कारण जागिर छोड्नुपरेको, भारतमा रहेका नेपालीबीच पार्टी संगठन विस्तार गरेको र नेपालका विभिन्न जिल्लामा राजनीतिक तथा सांस्कृतिक गतिविधिमा संलग्न भएको स्मरण गर्नुभएको छ ।
उहाँका अनुसार, सन् २००९ मा मूल प्रवाह अखिल भारत सम्मेलनको छैटौँ अखिल भारत सम्मेलनका क्रममा पूर्णकालीन कार्यकर्ता बनेपछि उहाँले जागिर छोड्नुभएको थियो । त्यसपछि पार्टीका विभिन्न जिम्मेवारी निर्वाह गर्नुभएको क्षेत्री २०७२ सालदेखि ‘युगज्योति’ प्रकाशनको जिम्मेवारीमा समेत संलग्न हुनुभएको थियो । २०७६ सालमा राष्ट्रिय जनमोर्चाको पाँचौँ राष्ट्रिय सम्मेलनबाट उहाँ केन्द्रीय कोषाध्यक्षमा निर्वाचित हुनुभएको थियो ।
क्षेत्रीले आफ्नो राजनीतिक यात्राका क्रममा अर्घाखाँची, बुटवल, नेपालका विभिन्न जिल्ला तथा भारतको दिल्ली र फरिदाबादमा संगठन निर्माण र विस्तारको काम गरेको बताउनु भएको थियो । सांस्कृतिक मोर्चामार्फत राजनीतिक तथा सामाजिक चेतना फैलाउने गतिविधिमा पनि उहाँले भूमिका निर्वाह गर्नुभएको थियो ।
आफ्नो राजनीतिक दृष्टिकोण प्रस्तुत गर्दै क्षेत्रीले राष्ट्रिय जनमोर्चाको राजनीतिक धार भविष्यमा जनताले स्वीकार गर्ने विश्वास व्यक्त गर्नुभएको छ । उहाँले देशको कृषि, शिक्षा, स्वास्थ्य तथा आधारभूत आवश्यकतासम्बन्धी समस्याबारे चर्चा गर्दै नेपालको विशिष्ट परिस्थितिअनुसार मार्क्सवादको प्रयोग गर्न सक्ने राजनीतिक शक्तिको आवश्यकता रहेको धारणा राख्नुभएको छ ।
क्षेत्रीले आफ्नो संस्मरणमा स्वास्थ्य समस्याबारे पनि उल्लेख गर्नुभएको छ । उहाँका अनुसार, २०८३ वैशाखदेखि बिरामी परेपछि बोन म्यारो क्यान्सरको उपचार सुरु गरिएको थियो । उपचारका कारण शारीरिक रूपमा सक्रिय हुन कठिन भए पनि पार्टीलाई अन्य माध्यमबाट सहयोग गरिरहने प्रतिबद्धता उनले व्यक्त गर्नुभएको छ।
कलकत्ताको बाल्यकालदेखि राजनीतिक आन्दोलन, भारतमा संगठन निर्माण, सांस्कृतिक गतिविधि र पार्टीको आर्थिक जिम्मेवारीसम्मको यात्रा समेटिएको उहाँको संस्मरणले लामो समयसम्म राजनीतिक संगठनमा बिताएको जीवनका विभिन्न पक्ष उजागर गरेको छ ।
राष्ट्रिय जनमोर्चाका केन्द्रीय कोषाध्यक्ष मधुकुमार क्षेत्रीप्रति भावपूर्ण श्रद्धाञ्जली ।
