भरतपुर । चितवन कारागार रहेका कैदीबन्दीले रसुवा बाढीप्रभावितलाई सहयोग गरेका छन् । कैदीबन्दीले आर्थिक सङ्कलन र श्रमदान गरी प्रभावित परिवारलाई बन्दोबस्तीका सामान सहयोग गरेका हुन् ।
प्रमुख जिल्ला अधिकारी गणेश अर्यालयलाई सोमबार कारागार परिसरभित्र उनीहरूले ती सामग्री हस्तान्तरण गरेका हुन् । उनीहरूले डसना, ब्लाङ्केट, तन्ना, सिरानी, सिरानीको खोल, गम्छा, नङकटर, साबुन, दाँत माझ्ने ब्रस, मन्जन र काहियो एक सय २५ सेटका दरले उपलब्ध गराएका हुन् ।
कैदीबन्दीले रु सयदेखि रु दुई हजारसम्म नगद र श्रम दानगरी ती सामग्री उपलब्ध गराइएका हुन् । रु तीन लाख ६७ हजार ३६ बराबरको सामान खरिद गरी डसना र सिरानी कारागार परिसरमा नै बनाइएको सो अवसरमा जानकारी दिइयो ।
प्रमुख जिल्ला अधिकारी अर्यालले कारागार जीवन बिताइरहेकाबाट गरिएको यो सहयोग उदाहरणीय र नमूना किसिमको भएको बताए । कारागारमा हाल सात सय ५० जना कैदीबन्दी रहेका छन्, जसमध्ये सात सय आठ जना पुरुष र ४२ जना महिला छन् ।
