नुवाकोट, भदौ १६ । अखिल नेपाल राष्ट्रिय स्वतन्त्र विद्यार्थी युनियन (छैठौँ) का केन्द्रीय अध्यक्ष सुवास जिसीले नुवाकोटमा बाढीबाट प्रभावित क्षेत्रको स्थलगत अवलोकनपछि पीडितलाई राहतसँगै दीर्घकालीन सहयोग आवश्यक रहेको बताएका छन् ।
नुवाकोट पुगेर स्थानीय, शिक्षक तथा पीडितसँग छलफल गरेको जानकारी दिँदै अध्यक्ष जिसीले तत्काल चामल, दाल र लत्ताकपडाजस्ता राहत सामग्रीभन्दा पीडितको वास्तविक आवश्यकतामा केन्द्रित भएर सहयोग गर्नुपर्नेमा जोड दिए । उनका अनुसार कतिपय प्रभावित परिवारलाई तत्काल आयआर्जनको आवश्यकता रहेकाले सीपमूलक तालिममार्फत आत्मनिर्भर बनाउन सकिने विषयमा समेत छलफल भइरहेको छ ।
विशेषगरी त्रिभुवन त्रिवेणीस्थित ठूलो विद्यालयमा बाढीबाट भएको क्षतिलाई गम्भीर रूपमा लिँदै विद्यालय सञ्चालन हुनुअघि नै विद्यार्थी र शिक्षकका लागि मनोसामाजिक परामर्श तथा आवश्यक शैक्षिक सामग्रीको व्यवस्थापन गर्ने योजना अखिल छैठौँले बनाएको जिसीले बताए ।
त्यस्तै, प्रभावित क्षेत्रमा स्वयंसेवक परिचालन गरी पुनर्निर्माण तथा श्रमदानमा सहभागी हुने योजना पनि संगठनले अघि सारेको छ । स्थानीय तह, विभिन्न संघ–संस्था तथा सहयोगी निकायसँग समन्वय गरेर प्रभावकारी रूपमा काम गर्ने उनले बताए ।
अध्यक्ष जिसीले विपद्को समयमा राज्यका संयन्त्र अझ बढी सक्रिय, जिम्मेवार र संवेदनशील हुनुपर्नेमा जोड दिँदै सेना तथा सुरक्षा निकायसँगै स्वयंसेवी संगठन, राजनीतिक दल र आम नागरिकलाई समेत समन्वयात्मक रूपमा परिचालन गर्नुपर्ने धारणा राखे ।
उनले विपद्मा बेपत्ता भएका व्यक्तिको खोजी तथा उद्धारलाई तीव्र बनाउन, प्रभावित परिवारलाई तत्काल राहत र सुरक्षित बसोबासको व्यवस्था गर्न तथा दीर्घकालीन पुनर्निर्माणमा सरकारको प्रभावकारी भूमिका आवश्यक रहेको बताए ।
“राज्य एक्लैले मात्र ठूलो विपद्को सामना गर्न सक्दैन, जनताको स्वतःस्फूर्त पहल र विभिन्न संघ–संस्थाको सहयोगलाई राज्यले समन्वय गरी परिचालन गर्नुपर्छ,” अध्यक्ष जिसीको भनाइ छ ।
