काठमाडौं, २६ साउन । सुनसरीको देवानगञ्ज घटनाको निष्पक्ष छानबिन, पीडितलाई न्याय तथा सरकारसँग भएको सहमति कार्यान्वयनलगायतका माग राख्दै १२ दिनदेखि आमरण अनशनमा रहेका विनय यादवको स्वास्थ्य अवस्थाप्रति राष्ट्रिय मानव अधिकार आयोगले गम्भीर चासो व्यक्त गरेको छ।
आयोगले मंगलबार अनशनस्थल माइतीघर पुगेर यादवको स्वास्थ्य अवस्था र उपचारको व्यवस्थाबारे अनुगमन गरेको जनाएको छ। अनुगमनका क्रममा यादवको रक्तचाप र सुगरको मात्रा घट्दै गएको तथा लामो समयको अनशनका कारण स्वास्थ्य अवस्था गम्भीर बन्दै गएको पाइएको आयोगले जनाएको छ।
अनशन सुरु भएको १२ दिन बितिसक्दा पनि सरकारका तर्फबाट स्वास्थ्य उपचार वा वार्ताका लागि पहल नभएको आयोगको भनाइ छ। आयोगले यादवको जीवन रक्षाका लागि प्रभावकारी स्वास्थ्य उपचारको व्यवस्था गर्न तथा वार्तामार्फत समस्या समाधान गर्न नेपाल सरकारलाई आग्रह गरेको छ।
