धनबहादुर मगर/कमल राना
काठमाडौँ, अगस्ट ९ । ३२औँ विश्व आदिवासी दिवस नेपाल आदिवासी जनजाति महासंघको आयोजनामा “प्राप्त अधिकारको रक्षा आजको आवश्यकता, पहिचानसहितको समावेशी र न्यायपूर्ण नेपाल निर्माणको हाम्रो साझा प्रतिबद्धता” भन्ने मूल नाराका साथ देशभर विभिन्न कार्यक्रम गरी मनाइँदैछ।
मूल समारोह आयोजक समितिले राजधानीमा साउन २१ गते पत्रकार सम्मेलन गरी प्रेस विज्ञप्तिमार्फत विश्व आदिवासी दिवसका कार्यक्रमबारे जानकारी गराएको हो।
नेपाल आदिवासी जनजाति महासंघले संयुक्त राष्ट्रसंघको घोषणाअनुसार प्रत्येक वर्ष अगस्ट ९ का दिन विश्व आदिवासी दिवस मनाउँदै आएको छ। यस अवसरमा नेपालमा पनि देशभर विभिन्न कार्यक्रम आयोजना गरी दिवस मनाउने महासंघले जनाएको छ।
मूल समारोह समितिका अनुसार बिहान १०ः३० बजे भृकुटीमण्डपमा भेला भई जुलुससहित टुँडिखेलको खुला मैदानमा पुगेर सभा गरिनेछ। ‘विश्व आदिवासी दिवस मूल समारोह–२०८३’ अन्तर्गत आयोजना हुने उक्त जुलुसमा आदिवासी जनजातिको पहिचान झल्काउने विभिन्न झाँकी तथा सांस्कृतिक प्रदर्शन गरिने जनाइएको छ।
जुलुसमा हजारौँको सहभागिता रहने आयोजकले जनाएको छ। आदिवासी जनजातिका विभिन्न समुदायको पहिचान, संस्कृति र परम्परा झल्काउने झाँकीसहित प्रदर्शन गरिनेछ।
उक्त कार्यक्रममा नेपालसहित ६० भन्दा बढी देशका सञ्चारकर्मीसमेत सहभागी हुने मूल समारोह समितिले जनाएको छ।
विश्व आदिवासी दिवस विश्वभरका आदिवासी जनजातिले आफ्नो समुदायको इतिहास, सभ्यता, भाषा, संस्कृति, परम्परागत ज्ञान, जीवनदर्शन तथा मानव सभ्यताको विकासमा उनीहरूले पुर्याएको ऐतिहासिक योगदानको सम्मान गर्ने महत्वपूर्ण दिवसका रूपमा लिइन्छ।
संयुक्त राष्ट्रसंघको महासभाले सन् १९९४ अगस्ट ९ लाई अन्तर्राष्ट्रिय विश्व आदिवासी दिवसका रूपमा मनाउने निर्णय गरेपछि विश्वभरका विभिन्न मुलुकमा बसोबास गर्ने आदिवासी समुदायले यस दिवसलाई आफ्नो अस्तित्व, पहिचान, अधिकार र सम्मानको साझा अभियानका रूपमा निरन्तर मनाउँदै आएका छन्।
