काठमाडौं । कप्तान किलियन एमबाप्पे र उसमान डेम्बेलेको उत्कृष्ट प्रदर्शनमा फ्रान्स फिफा विश्वकप २०२६ को सेमिफाइनलमा प्रवेश गरेको छ।
अमेरिकाको बोस्टन स्टेडियममा शुक्रबार बिहान भएको पहिलो क्वाटरफाइनलमा फ्रान्सले मोरक्कोलाई २–० ले पराजित गर्दै अन्तिम चारमा स्थान सुरक्षित गर्यो।
पहिलो हाफमा एमबाप्पेको पेनाल्टी मोरक्कोका गोलकिपर यासिन बोनोले बचाएपछि खेल गोलरहित बराबरीमा सकिएको थियो। बोनोले पहिलो हाफभरि उत्कृष्ट प्रदर्शन गर्दै फ्रान्सका केही आकर्षक अवसर विफल पारे।
दोस्रो हाफमा भने फ्रान्सले खेल आफ्नो पक्षमा पार्यो। ६०औँ मिनेटमा डिजायर डुएको पासमा एमबाप्पेले गोल गर्दै टोलीलाई अग्रता दिलाए। त्यसको छ मिनेटपछि एमबाप्पेकै पासमा डेम्बेलेले गोल थपेपछि फ्रान्सले सहज जित निकाल्यो।
यस जितसँगै सन् २०१८ को विश्वविजेता तथा साविक उपविजेता फ्रान्स लगातार तेस्रो पटक विश्वकपको सेमिफाइनलमा पुगेको छ। अब फ्रान्सले फाइनल प्रवेशका लागि स्पेन र बेल्जियमबीचको विजेतासँग प्रतिस्पर्धा गर्नेछ।
पराजयसँगै मोरक्कोको अन्तर्राष्ट्रिय फुटबलमा लगातार ३४ खेलको अपराजित यात्रा पनि टुंगिएको छ।
एमबाप्पेले यस विश्वकपमा आठ गोल र तीन असिस्ट गर्दै गोल्डेन बुटको दौडमा अग्रता कायम राखेका छन्। उनका विश्वकप करियरका कुल गोल संख्या २० पुगेको छ।
