काठमाडौं, २९ जेठ । घरेलु टोली मेक्सिकोले दक्षिण अफ्रिकालाई पराजित गर्दै फिफा विश्वकप फुटबल २०२६ को उद्घाटन खेलमा विजयी सुरुआत गरेको छ।
मेक्सिको सिटीस्थित रङ्गशालामा आज सम्पन्न खेलमा मेक्सिकोले दक्षिण अफ्रिकामाथि २–० गोलअन्तरको जित दर्ता गर्दै प्रतियोगिताको यात्रा सुखद् रूपमा प्रारम्भ गरेको हो।
मेक्सिकोको जितमा जुलियन क्विनोनेस र राउल जिमेनेजले समान एक–एक गोल गरे। खेलको नवौँ मिनेटमा इरिक लिराको पासमा जुलियन क्विनोनेसले गोल गर्दै मेक्सिकोलाई सुरुआती अग्रता दिलाएका थिए।
खेलको ४९औँ मिनेटमा दक्षिण अफ्रिकाका सेफेलो सिथोले रातो कार्ड पाएपछि टोली १० खेलाडीमा सीमित भएको थियो। त्यसको फाइदा उठाउँदै मेक्सिकोले खेलमा आफ्नो दबाब कायम राख्यो।
मेक्सिकोका राउल जिमेनेजले ६७औँ मिनेटमा गोल गर्दै टोलीको अग्रता दोब्बर बनाए। त्यसपछि खेलको ८४औँ मिनेटमा दक्षिण अफ्रिकाका थेम्बा ज्वानेले पनि रातो कार्ड पाएर मैदान छाडेपछि दक्षिण अफ्रिका नौ खेलाडीमा सीमित हुन पुगेको थियो।
खेलको दोस्रो हाफको इन्जुरी समयमा मेक्सिकोका सेजर मोन्टेसले पनि रातो कार्ड पाएर मैदानबाट बाहिरिए। यससँगै उद्घाटन खेलमा दुवै टोलीका गरी तीन खेलाडीले रातो कार्ड पाएका थिए।
यस जितसँगै समूह ‘ए’मा रहेको मेक्सिकोले महत्वपूर्ण तीन अंक बटुलेको छ। समूह ‘ए’ अन्तर्गत आजै हुने अर्को खेलमा चेक गणतन्त्र (चेक रिपब्लिक) र दक्षिण कोरियाबीच प्रतिस्पर्धा हुनेछ। उक्त खेल नेपाली समयअनुसार बिहान ७ः४५ बजे सुरु हुने तालिका छ।
