काठमाडौँ, जेठ २८ — विश्व फुटबलको सबैभन्दा ठूलो प्रतियोगिता फिफा विश्वकप २०२६ आजदेखि अमेरिका, मेक्सिको र क्यानडामा संयुक्त रूपमा सुरु हुँदैछ। ४८ टोली सहभागी रहेको यो विश्वकप इतिहासकै सबैभन्दा ठूलो संस्करण मानिएको छ, जसमा जुलाई १९ सम्म कुल १०४ खेल खेलाइनेछन्।

उद्घाटन खेलमा आयोजक राष्ट्र मेक्सिकोले दक्षिण अफ्रिकाको सामना गर्नेछ। मेक्सिको सिटीस्थित ऐतिहासिक एज्टेका रंगशालामा हुने खेल नेपाली समयअनुसार मध्यरातपछि सुरु हुनेछ।

यसपटक विश्वकप फुटबलसँगै संगीत, मनोरञ्जन र सांस्कृतिक उत्सवको केन्द्रसमेत बन्ने अपेक्षा गरिएको छ। विभिन्न आयोजक सहरहरूमा अन्तर्राष्ट्रिय कलाकारहरूको प्रस्तुति रहनेछ भने विश्वभरका समर्थकहरू फुटबल महोत्सवको प्रतीक्षामा छन्।

विश्वकपको फाइनल जुलाई १९ मा अमेरिकाको न्युयोर्क–न्युजर्सी क्षेत्रमा रहेको रंगशालामा हुनेछ।