टेकराज भुसाल
अर्घाखाँची, २६ जेठ । खेलकुदको विकास, युवाको पहिचान स्थापित गर्ने तथा स्वस्थ जीवनशैली प्रवर्द्धन गर्ने उद्देश्यले महादेव फार्मेसी धारापानीको आयोजनामा भूमिकास्थान नगरपालिका–४ मर्दिनडाँडामा सम्पन्न खुला पुरुष भलिबल प्रतियोगिताको उपाधि घोरबन्दा युवा क्लब, सितगंगाले जितेको छ।
प्रतियोगिताको फाइनल खेलमा घोरबन्दा युवा क्लब सितगंगाले आयोजक महादेव फार्मेसी धारापानीलाई ३–० को सोझो सेटमा पराजित गर्दै उपाधि आफ्नो नाममा गरेको हो। उत्कृष्ट प्रदर्शन गरेको सितगंगा टोलीले सुरुदेखि नै खेलमा दबाब कायम राख्दै आयोजक टोलीलाई पराजित गर्न सफल भएको थियो।
उपाधिसँगै घोरबन्दा युवा क्लब सितगंगाले नगद रु ५० हजार, शिल्ड, मेडल तथा प्रमाणपत्र प्राप्त गरेको छ। उपविजेता बनेको महादेव फार्मेसी धारापानीले नगद रु ३० हजारसहित शिल्ड, मेडल र प्रमाणपत्र प्राप्त गरेको छ।
त्यसैगरी, थ्री स्टार युवा क्लब भूमिकास्थान तृतीय हुँदै नगद रु २० हजारसहित शिल्ड, मेडल तथा प्रमाणपत्र प्राप्त गर्न सफल भएको छ। भगवती युवा क्लब, सन्धिखर्कले सान्त्वना स्थान हासिल गर्दै नगद रु १० हजार, शिल्ड, मेडल तथा प्रमाणपत्र हात पारेको छ।
प्रतियोगितामा जिल्लाका विभिन्न क्षेत्रका आठ टोलीको सहभागिता रहेको थियो। प्रतियोगितामार्फत स्थानीयस्तरका खेलाडीहरूले आफ्नो प्रतिभा प्रदर्शन गर्ने अवसर पाएको आयोजकले जनाएको छ।
प्रतियोगिताको उद्घाटन जेठ २३ गते भूमिकास्थान नगरपालिकाका नगरप्रमुख झविलाल थापा ले गर्नुभएको थियो।
आयोजकका अनुसार यस्ता प्रतियोगिताले युवाहरूलाई खेलकुदप्रति आकर्षित गर्नुका साथै सामाजिक सद्भाव, अनुशासन र स्वस्थ प्रतिस्पर्धाको भावना विकास गर्न महत्वपूर्ण योगदान पुर्याउने अपेक्षा गरिएको छ।
