जापान । जापान नेपाली एकता समाज कान्तो क्षेत्रीय समितिको आयोजनामा र रक्तिम साँस्कृतिक अभियानको विशेष प्रस्तुति सहित “प्रगतिशील देउसी, भैलो” कार्यक्रम टोकियोमा भव्यताका साथ सम्पन्न भएको छ।
कार्यक्रमलाई कान्तो क्षेत्रीय समितिका सचिव ऋषिराम पौडेलको सञ्चालन तथा अध्यक्ष गोम बुढाथोकीको अध्यक्षतामा सुरुवात गरिएको थियो। कार्यक्रमलाई प्रमुख अथिती के.सीद्वारा दियो वाली उद्घाटन गरिएको थियो । त्यस पछि शहीदहरूको सम्झनामा एक मिनेट मौनधारण गरी उपस्थित अतिथि तथा दर्शकहरूलाई समितिका उपाध्यक्ष यामप्रसाद पौडेलले शब्दद्वारा स्वागत गर्नुभएको थियो।
समाजका केन्द्रीय अध्यक्ष डण्ड केसीको प्रमुख आतिथ्यतामा सम्पन्न उक्त कार्यक्रममा यहाँले नेपाली संस्कृति, कला र पहिचानलाई प्रवासमा पनि जीवित राख्न “एकता समाज”ले महत्वपूर्ण भूमिका निर्वाह गरिरहेको बताउँदै, “नेपालका विशेष चाडपर्वहरूमा हामीले यस्ता कार्यक्रम आयोजना गरेर नेपालीपनलाई संसारभर फैलाइरहेका छौँ,” भन्ने धारणा व्यक्त गर्नुभयो साथै तिहार, छठ, नेपाल सम्वत ११४६ का साथै कार्यक्रमको सफलताको शुभ कामना व्यक्त गर्नु भएको थियो ।
महासचिव धनराज शर्माले देश गम्भीर राजनीतिक र सामाजिक संकटमा परेका बेला बिदेशमा रहेका नेपालीहरूले पनि आ–आफ्नो स्थानबाट देशको पक्षमा आवाज उठाउनु पर्ने आवश्यकता औंल्याउँदै, “देश जोगाउने आवाज सधै देशभित्र मात्र होइन, परदेशमा रहेका नेपालीहरूबाट पनि महत्व पूर्ण जिम्बेवारी रहेको र देशलाई अफ्ठारो परेको वेला हामी देशमै फर्कन सक्नु पर्ने हुदा अवश्यकता परे सबैलाई तयार रहन अनुरोध गर्नु भयो । उहाँले तिहार, छठ, नेपाल सम्वत ११४६ का साथै कार्यक्रमको सफलताको शुभ कामना व्यक्त गर्नु भएको थियो ।
रक्तिम अभियान जापानका सचिव नारायण ज्ञवाली, गुल्मेली समाज जापानका संरक्षक शालिकराम भण्डारी, नेपालबाट भ्रमणमा आएका रामहरि तिवारी र हरिमाया तिवारी लगायतका अतिथिहरूको विशेष उपस्थिति रहेको थियो।
औपचारिक कार्यक्रम पश्चात् रक्तिम अभियानका कलाकारहरूले प्रस्तुत गरेको साँस्कृतिक कार्यक्रम अत्यन्तै मनोरञ्जक र भावनात्मक रह्यो ।
कलाकार नवीन बस्याल, नारायण ज्ञवाली, दानु सारू मगर, निरु संजाली, कोपिला घर्तिमगर, अश्मी पुन मगर, संगीता घिमिरे, युनिका शर्मा लगायतले “पैयौं फुल्दा त्यो लेखलेख बेशीमा बुकी फुल्दैछ”, “फर्कौं अब स्वदेशमा हामी”, “रातो लालटिन, सयपत्री फुल्दा तिहारको बेला” जस्ता गीतमा आकर्षक नृत्य प्रदर्शन गरे।
त्यसैगरी, “भनिदेऊ चन्द्रमा तिमी जस्तै प्यारो मेरो भाइ कहाँ बोल” बोलको गीतमा परदेशी दाजुभाइको सम्झनामा गरिएको अभिनयले दर्शकहरूलाई भावुक बनायो।
साँस्कृतिक प्रस्तुति र देउसी, भैलोका माध्यमबाट कलाकारहरूले नेपाली परम्परा, देशप्रेम र सहकार्यको सन्देश प्रवासमा छरिरहेका थिए ।
कार्यक्रमको अन्त्यमा अध्यक्ष गोम बुढाथोकीले धन्यवाद ज्ञापन गर्दै देउसी,भैलो कार्यक्रम औपचारिक रूपमा विसर्जन गर्नुभएको थियो ।
