गलकोट (बागलुङ) । कालीगण्डकी करिडोरअन्र्तगत बागलुङ नगरपालिका–१० दब्ल्याङमा पहिरोले दु:ख दिन थालेको पाँच वर्ष पुग्यो । हरेक बर्खामा एउटै स्थानबाट पहिरो खस्दा सडकमा यातायात अवरुद्ध हुँदै आएको छ ।
यस वर्षको बर्खामा भने बागलुङ नगरपालिका–१३ कालाखोला बगरमा ठुलो पहिरो थपिएको छ । उक्त स्थानमा पहिरोले सडकको ५० मिटर ट्रयाक नै क्षति पुर्याएको छ ।
राष्ट्रिय गौरवको आयोजनाको रूपमा रहेको कालीगण्डकी करिडोरको गैँडाकोट–राम्दी–मालढुङ्गा खण्ड ठुला चट्टान काटेर सडक स्तरोन्नति गरिएकाले पहिरो खसिरहेको छ । कालीगण्डकी करिडोरकोे गैडाकोट–राम्दी–मालढुङ्गा खण्डमा पर्ने २४० किमिमा एक दर्जनभन्दा बढी स्थानमा पहिरोको समस्या रहेको आयोजना कार्यालय पाल्पाका इञ्जिनियर उत्सव बस्यालले बताउनुभयो ।
गैडाकोट–राम्दी–मालढुङ्गा खण्डमा पर्ने २४० किमि र कालीगण्डकी लोकमार्गको मिर्मी–सेतिबेनी–अर्मादी–कुश्माको ५३ सहित जम्मा २९३ किमि सडक रहेकोमा अहिलेसम्म ८० प्रतिशत भौतिक र ७० प्रतिशत वित्तीय प्रगति सम्पन्न भएको इन्जिनियर उत्सव बस्यालले बताउनुभयो । उक्त खण्डमा पहिरो मर्मतमै ८० करोड रुपियाँ खर्च लाग्ने अनुमान गरिएको छ ।
आर्थिक वर्ष २०६६/६७ बाट सुरु भएको गँैडाकोट–राम्दी–मालढुङ्गा खण्ड २०८३/८४ मा सम्पन्न गर्ने लक्ष्य छ । २० अर्ब रुपियाँ लागत अनुमान गरिएको उक्त खण्डको ७८० प्रतिशत भौतिक प्रगति सम्पन्न गर्न रु १४ अर्ब सात करोड खर्च भइसकेको छ ।
अन्तिम चरणमा आएको आयोजनामा चट्टानसहितको पहिरोको चुनौती थपिएको भन्दै पहिरो रोकथामका लागि मात्रै झन्डै रु ८० करोड खर्च लाग्ने देखिएको उहाँको भनाइ छ ।
‘बागलुङमा तीन ठाउँमा पहिरोले सडकको ट्रयाक नै बगाएको छ । पुरानै अवस्थामा फर्काउन ठुलो खर्च लाग्छ । अहिले कालोपत्र सम्पन्न भइसकेको खण्डमा समेत चट्टानसहितको पहिरोले समस्या बनाएको छ । पन्छाउने मात्रै काम भइरहेको छ’ इन्जिनियर बस्लालले भन्नुभयो– ‘अक्करे भिर काटेर बनाइएको सडकमा चट्टानसहितको पहिरो निरन्तर चलिरहेको छ । बजेट हुँदा साथ पहिरो मर्मततर्फ आयोजनाको ध्यान जान्छ ।’
गैँडाकोट–राम्दी–मालढुङ्गा खण्डमध्ये बागलुङ खण्डमा ३४.७० किमि सडक पर्दछ । यसमध्ये बलेवा–जैमिनी खण्डको २४ किमि सडक कालोपत्र सम्पन्न भइसकेको छ भने बलेवा–मालढुङ्गा सडकको १० किमि सडक कालोपत्रको चरणमा छ । बलेवा–मालढुङ्गा खण्डमा भने बल्ल ५६ प्रतिशत भौतिक प्रगति भएको छ ।
२०७९ मङ्सिर २६ गते ३६ महिनामा निर्माण सक्ने गरी कालिका कन्ट्रक्सनले करिडोरको बलेवा हर्मिचौर खण्डको जिम्मा लिएर सम्पन्न गरेको छ भने बलेवा–मालढुङ्गा खण्डको १० किमि सडक खड्का, कृष्ण बिएन जेभीले २०७९ मङ्सिर २९ गते दुई वर्षमा सक्ने गरी ठेक्का सम्झौता गरिएको थियो ।
ठेक्का नसक्दा म्याद थप गरेर काम गरिरहेको छ । चालु आर्थिक वर्षमा समेत उक्त खण्डको काम सम्पन्न गरिने र करिडोरको ध्यान ठुला पहिरो मर्मतमा जाने इञ्जिनियर बस्यालको भनाइ छ । (रासस)
