धनगढी । कैलालीमा एक जना युवकको विभत्स हत्या भएको छ । आफूले हत्या गरेको भन्दै मृतकको टाउको बोकेर दुई जना प्रहरी कार्यालयमा पुगेका छन् ।
घोडाघोडी नगरपालिका–८ जरैमा गए राती साथीसाथीबिच विवाद हुँदा २८ वर्षीय केशरबहादुर बुढाको घाँटी रेटेर हत्या भएको हो ।
सँगै बसेर मदिरा सेवन गरेका बलबहादुर विक र गङ्गा बुढाक्षेत्रीले केशरको घाँटी रेटेर हत्या गरेको इलाका प्रहरी कार्यालय सुखडका प्रमुख प्रहरी नायब उपरीक्षक रमेशदत्त अवस्थीले जानकारी दिए ।
हत्यामा संलग्न विक र बुढाक्षेत्री मृतकको टाउको बोकी सोही वडाको प्रतिखेतस्थित प्रहरी चौकीमा आत्मसमर्पण गर्न पुगेका थिए । प्रहरीले दुवै जनालाई नियन्त्रणमा लिएको छ ।
विभत्स घटना भएपछि सो क्षेत्रका स्थानीय त्रसित भएका छन् । मृतक बुढाका बाबुआमा सुर्खेतको चौकुने गाउँपालिका–३ मोरीवनस्थित घरमा बस्दै आएका छन् ।
सुर्खेतबाट मृतकका आफन्तहरू आइपुगेपछि शवको मुचुल्का, पोस्टमार्टम लगायतका कानुनी प्रक्रिया सुरु हुने अवस्थीले जानकारी दिए ।
