काठमाडौं । नेपालले क्रिकेटमा ऐतिहासिक रुपमा जित हाँसिल गरेको छ । नेपालले वेस्ट इन्डिजसँगको शृंखलामा लगातार दुई जित निकाल्दै एक खेल अगावै शृंखला आफ्नो नाममा गरेको हो ।
नेपालले वेस्ट इन्डिजलाई ९० रनको फराकिलो अन्तरले पराजित गर्दै उक्त शृंखलाको उपाधि जितेको हो । २ दिनअघि शनिबार पहिलो खेलमा पनि नेपालले वेस्ट इन्डिजविरुद्ध १९ रनको ऐतिहासिक जित हासिल गरेको थियो ।
वेस्ट इन्डिजसँगको सोमबार भएको दोश्रो खेलमा नेपालले ब्याटिङ, बलिङ र फिल्डिङ तीनवटै पक्षमा गजबको प्रदर्शन गर्यो । सोमबार नेपालले दिएको एक सय ७४ रनको लक्ष्य पछ्याएको वेस्ट इन्डिज ८३ रनमा अलआउट भयो। वेस्ट इन्डिज १७ दशमलव एक ओभरमा सबै विकेट गुमाउदै ८३ रनमा समेटिएको हो । सिरिजको फाइनल भिडन्त मंगलबार राति ८ः१५ बजे सारजाह मैदानमा हुँदैछ।
सिरिजको दोस्रो खेलमा वेस्ट इन्डिजका लागि जेसन होल्डरले १५ बलमा दुई छक्कासहित सर्वाधिक २१ रन बनाए । यस्तै, एकिम अगष्टले १७ तथा अमिर जांगो १६ रन जोडे ।
नेपालको लागि आदिल आलमले ४ विकेट लिए । उनको यो उत्कृष्ट पुनरागमन हो। कुशल भुर्तेलले तीन, ललित राजवंशी र दीपेन्द्रसिंह ऐरीले १–१ विकेट हात पारे।
नेपालका लागि आसिफ शेख र सन्दीप जोराले सानदार अर्धशतक बनाएका थिए । आसिफले ४७ बलमा आठ चौका र दुई छक्काको मद्दतले अविजित ६८ रनको योगदान गरे । यसैगरी सन्दीप जोराले ३९ बलमा पाँच छक्का र तीन चौकासहित ६३ रन र मोहम्मद आदिल आलमले ११ रन बनाएका थिए ।
