मनोज भट्ट

हिजो राजधानीमा एमसीसीको विषयलाई लिएर एउटा अन्तक्रिया कार्यक्रम आयोजना भएको थियो । उक्त कार्यक्रममा ने.क.पा. (मसाल) का महामन्त्री कमरेड मोहनविक्रम सिंहद्वारा व्यक्त विचारमाथि सामाजिक सञ्जाल प्रयोगकर्ताहरूले केही प्रश्नहरू उठाएका छन् । जस्तै दलाई लामाको पुनःस्थापना हावादारी भएको, चीन आफ्‌नो सुरक्षा आफै गर्न सक्षम रहेको, नेपालमा अमेरिकी गतिविधि बढ्दा चीनलाई असर नपर्ने जस्ता कुरा उठाइएको पाइएका छन् । त्यसबारे केही स्पष्टताको आवश्यकता छ ।

१. नेपालको भूमि चीनका विरुद्ध प्रयोग नहोस् भनेर चीनले आफ्‌नो सुरक्षाको सवालमा नेपालबाट सधैँ आश्वस्त हुन चाहन्छ । नेपालको सरकारी प्रतिनिधि मण्डल चीन जाँदा वा चीनको सरकारी प्रतिनिधि मण्डल नेपाल आउँदा चीनको मुख्य सरोकार नेपालको भूमि चीनका विरुद्ध प्रयोग नहोस् भन्ने नै रहने गरेको छ ।

२. नेपाली भूमि चीनका विरुद्ध प्रयोग हुन सक्दछ भन्ने सवालमा चीन चिन्तित छ । त्यसका पछाडि कैयौँ कारणले काम गरेको छ । नेपालमा कैयौँ तिब्बती शरणार्थी शिविरहरू छन् । ती तिब्बती शरणार्थी शिविरहरूलाई पश्चिमा शक्तिहरूले तिब्बत विरोधी गतिविधिमा गुप्त तथा खुल्ला रुपमा प्रयोग गर्ने गरेका छन् ।

३. केही समय यता नेपाललाई अमेरिकाले प्राथमिकतामा राख्दै आएको छ । अमेरिकाले नेपाललाई प्राथमिकता दिनुका पछाडि मुख्यतया चीनलाई कमजोर पार्ने रणनीति नै हो । अमेरिका सहित पश्चिमा शक्तिहरू नेपाली भूमिलाई चीनका विरुद्ध प्रयोग गर्ने पूरा प्रयत्न गरेका छन् । एमसीसी सम्झौता त्यसको एउटा कडीको रूपमा अगाडि सारिएको छ । त्यसैगरी नेपाल बढ्दो इसाइकरणले समेत चीनलाई चिन्तित बनाइरहेको छ ।

४. नेपाली भूमि चीनका विरुद्ध प्रयोग भएमा नेपाल अन्तर्राष्ट्रिय द्वन्द्वको वा युद्धको रणमैदानमा परिणत हुनेछ । त्यसबाट नेपालको सार्वभौमिकता र राष्ट्रियतालाई नै आघात पुग्ने छ ।

५. अमेरिकाले चीनको वरिपरि, २५० वटा सैन्य अखडा खडा गरेको छ ।

६. चीनको घेराबन्दीका लागि अमेरिकाले चीनसँग सीमा जोडिएका हिन्द प्रशान्त क्षेत्रका देशहरू नेपाल, बङ्गलादेश, श्रीलङ्का, बर्मालाई उच्च प्राथमिकता दिइरहेको छ ।

७. चीनका विरुद्ध बौद्ध, क्रिश्चियन तथा मुस्लिम धर्मालम्बीहरूलाई समेत प्रयोग गरेर अमेरिका सहितका पश्चिमा शक्तिहरूले चीनमा उपद्रव मच्चाइरहेका छन् ।

८. अमेरिका र चीनबिचको द्वन्द्व वा युद्धले विश्व शान्तिलाई असर पर्दछ नै त्यसका साथै यदि नेपाली भूमि अमेरिकाले चीनका विरुद्ध प्रयोग गरेमा नेपाल अन्तर्राष्ट्रिय शक्ति केन्द्रको रण मैदानमा परिणत हुने छ । त्यसबाट नेपालको राष्ट्रियता, सार्वभौमसत्ता र अखण्डतामा नै असर पर्नेछ । त्यसैले कसैलाई मोहनविक्रम सिंह व्यक्तिगत रूपमा मन नपर्न सक्नु हुन्छ । तर उहाँबाट व्यक्त विचार राष्ट्रियता, सार्वभौमिकता र अखण्डताको चिन्ताबाट प्रेरित छन् ।

नेपालमा बढ्दो अमेरिकी गतिविधिलाई खिसिट्युरीको विषय बनाउनुको परिणाम अन्ततः जान वा अन्जानमा साम्राज्यबादीहरुको रणनीतिको सेवा गर्नु नै हुनेछ।