प्रकाश थापामगर र गोविन्दकुमार शर्मा, काठमाडौँ ।
राष्ट्रिय जनमोर्चाका केन्द्रीय सल्लाहकार टङ्क गौतमले पूर्वेली जनता सङ्घीयताको पक्षपाती नभएको दाबी गर्नुभएको छ ।
युगदर्शन मिडियालाई २०८२ साउन ७ गते प्रतिक्रिया दिँदै उहाँले सो दाबी गर्नुभएको हो ।
‘काङ्ग्रेस, एमालेकै कार्यकर्ताहरू सङ्घीयता ठिक छैन भन्छन्’ उहाँले भन्नुभयो– ‘सङ्घीयता ठिक छैन भन्दै चित्रबहादुर केसी एक्लै लडिरहेका छन्, यी हाम्रा नेताहरू बिग्रेर पो पूर्वेलीहरू !’
सङ्घीयता देशको लागि सही व्यवस्था नरहेको ठोकुवा गर्दै उहाँले त्यसको विरुद्धमा सङ्घर्ष आवश्यक रहेको बताउनुभयो ।
कोशी प्रदेशमा जातिवादी र क्षेत्रीयतावादीको प्रभाव चर्को रहेको सन्दर्भमा उहाँले राजमोको सङ्गठन विस्तारका सामु प्रशस्त चुनौती रहेको उहाँको स्वीकार्नुभयो ।
‘यहाँ किराँत पहिचान चाहियो भन्दै हिँड्छन् तर हामी नेपाली पहिचान नै कायम राखौँ भनिरहेका छौँ’ उहाँले भन्नुभयो– ‘अर्कातिर उपेन्द्र यादव नेतृत्वको जनता समाजवादी पार्टीले मधेस छोडो, पहाडिया पहाड चलो नारा लगाउँछ ।’
उहाँले यी दुवै अतिवादी विचारको विरुद्ध राजमो निरन्तर सङ्घर्ष गरिरहेको दाबी गर्नुभयो ।
आफू कम्युनिस्ट पार्टीको राजनीतिमा जोडिँदाको पृष्ठभूमिबारे चर्चा गर्दै उहाँले २०२६ सालतिर आफू सङ्खुवासभाको चैनपुरमा रहँदाको घटना स्मरण गर्नुभयो ।
‘पछि म झापा हुँदै विराटनगर झरेँ । सङ्खुवासभामा रहँदा गाउँमा माओत्सेतुङको लालबुक बाँडिएको थियो’ उहाँले भन्नुभयो ।
उतिखेर गाउँमा काङ्ग्रेस भनेको धनी, सम्पन्न वर्गको पार्टी र कम्युनिस्ट भनेको सर्वहारा, मध्यम वर्ग र गरिबको पार्टी हो भन्ने धारणा रहेको बताउँदै उहाँले सोही आधारमा आफू कम्युनिस्ट पार्टीमा लागेको बताउनुभयो ।
कम्युनिस्ट पार्टीमध्ये पनि नेकपा (मसाल) को राजनीतिमा कसरी लाग्नुभयो भन्ने युगदर्शनको प्रश्नको जबाफमा उहाँले भन्नुभयो– ‘पहिला मलाई कम्युनिस्ट पार्टी एउटै छ भन्ने लागेको थियो तर पछि नेपालमा धेरै कम्युनिस्ट पार्टी रहेको थाहा पाएँ ।’
‘काठमाडौँबाट केशव नेपालले मोहनविक्रम सिंहको अन्तर्वार्ता रहेको एउटा पत्रिका दिनुभयो’ उहाँले भन्नुभयो– ‘त्यो अन्तर्वार्ता पढेपछि कुन सक्कली कम्युनिस्ट पार्टी हो भनेर खोज्दै हिँड्दा मलाई मोहनविक्रम सिंहले नेतृत्व गरेको पार्टी मन पऱ्यो । त्यसपछि म मसालतिर लागेँ ।’
घरको कमजोर अवस्थाका कारण आफू भारततिर रोजगारीका लागि लागेको बताउँदै उहाँले पानीपतमा पुगेर सन् १९९७ तिर हालको मूल प्रवाह अखिल भारत नेपाली एकता समाजमा सङ्गठित भएको विगत पस्कनुभयो ।
नेता गौतमले अहिले आफू राष्ट्रिय जनमोर्चाको कोशी प्रदेश समितिको सल्लाहकार, मोरङ जिल्ला समितिको उपाध्यक्ष र विराटनगर नगर समितिको अध्यक्ष रहेको जानकारी दिनुभयो ।
